Sharbaqty aýdanyndaǵy №1, Aqsý qalasynyń Saryshyǵanaq aýylyndaǵy bilim berý uıymdarynda, sondaı-aq oblys ortalyǵyndaǵy birneshe mektepte 1 qyrkúıekte alǵashqy qońyraý soǵylmaýy ábden múmkin. Bul oqý oshaqtarynda bıyl jazda bastalǵan kúrdeli jóndeý jumystary sylbyr júrip, marǵaý merdigerler jaýapsyzdyq tanytyp otyr. Jasyryp ne keregi bar, oblystyq bilim berý basqarmasynyń basshylyǵy atalǵan nysandardyń aldaǵy 10 kún deresinde tolyq tapsyrylatynyna 100 paıyz senimdi emes.
Jańa oqý jyly qarsańynda Kerekýde kúrdeli jóndeý bastalǵan 46 mekteptiń 11-inde búginde jumystar tolyq aıaqtalypty. Qalǵan nysandar 1 qyrkúıekke deıin daıyn bolady dep kútilýde. Alaıda keıbir ǵımarattardaǵy jumystardyń sylbyr júrýinen táýekelder de az emes.
– Bıyl óńir mektepterinde 46 bilim berý nysanyna kúrdeli jóndeý júrgizilýde. Onyń ishinde «Mektepterdi jańǵyrtý» jobasy aıasynda – 33, óńirlik «Zamanaýı mektep» jobasy boıynsha – 4, «Aýyl – el besigi» baǵdarlamasy boıynsha 9 nysan qamtylǵan. Búginde 11 mektepte jumystar tolyq aıaqtaldy. О́zgeleri boıynsha kúrdeli jóndeýdi oqý jylynyń basyna deıin aıaqtaý josparlanyp otyr. Bir ǵana Sharbaqty aýdanynda 5 birdeı mektep jańarýda. Sonyń ishinde №1 mektepte jóndeý sharalarynyń sylbyr júrgenin anyqtadyq. Merdiger sońǵy kúnderi eńbek oryndarynyń sanyn kóbeıtip, jumysty údetti. Buǵan qosa Aqsýǵa qarasty Saryshyǵanaq mektebi de 1 qyrkúıekte balalardy qabyldaı almaýy múmkin. Degenmen bul jerdegi merdigermen jasalǵan kelisimshartta tapsyrý merzimi uzaǵyraq ekeni kórsetilgen. Jalpy, jóndeý jumystaryn ýaqtyly aıaqtaý boıynsha táýekelder bar ekenin jasyrmaımyz. Pavlodar qalasyndaǵy №5, 9, 22 mektepterde jóndeý qarqyndy jalǵasýda. Jaýapty kompanııalar úlgeremiz dep ýáde berdi. Joǵaryda atalǵan bilim oshaqtarynyń qaısysy oqý jylynyń alǵashqy kúni oqýshylardy qabyldaýǵa úlgere almaı qalýy múmkin ekenin boljap aıtý qıyn. Barlyq jaı-japsary 25 tamyzdan keıin anyqtalady, – dedi oblystyq bilim berý basqarmasynyń basshysy Samal Aıtqazına.
Pavlodar qalasyndaǵy №9, 29 jáne №39 mektepterdiń árqaısysy bıyl 1-synypqa on synyptan jınaǵan. Bala sanynyń kóptigine baılanysty bilim uıalary oqýshylardy úsh aýysymda oqytady. Al M.Áýezov atyndaǵy jáne №16, 21 orta mektepteriniń árqaısysynda segizden 1-synyp bar.
Dırektorlyqqa adam tabylmaı otyr
Bir qyzyǵy, teriskeıdegi mektepterde dırektorlar jetispeıdi. Elimizdiń ońtústik óńirlerimen salystyrǵanda bizdiń jaqtyń pedagogteri mansapqa umtylýda tym sypaıylyq tanytýynan ba eken, áıteýir dırektorlardyń ornyna jarııalanatyn keıbir konkýrstarǵa múlde úmitkerler tirkelmeı qalatyn jaǵdaılar jıi kezdesýde. Máselen, Pavlodar aýdany boıynsha eki birdeı orta oqý uıymy basshysyz otyr. Olarǵa konkýrs jarııalanǵanymen tilek tanytqandar bolmapty. Dırektorlardyń tapshylyǵynan aýdandaǵy Kemeńger jáne Mıchýrın aýyldyq mektepterin zeınet jasyndaǵy adamdar basqarýda. Olar zań boıynsha ornyn bosatýǵa tıis. Alaıda laýazymdyq oryn bosaǵanymen dırektorlyqqa keletin pedagog tabylmaı qalýy múmkin. Amaldyń joqtyǵynan bilim berý basqarmasy zeınetkerlerdiń mektep basqarýyna túsinistikpen qaraýǵa májbúr bolýda.
Bıylǵy oqý jylynda óńir boıynsha 360 mektep jumysyn jalǵastyrady. Olardyń 137-si – memlekettik tilde, 170-i – aralas jáne 53-i orys tilinde oqytady. 1 qyrkúıekte oblys ortalyǵynyń irgesindegi Temirjolshylar kentinde 210 oqýshyǵa laıyqtalǵan jańa mektepti ashý josparlanýda. Jańa oqý jylynda oblys boıynsha oqýshylar sany shamamen 114,8 myń bolady dep kútilýde. Bul ótken jylmen salystyrǵanda 2 myń balaǵa kóp eken. Al 11 049 jetkinshek alǵash ret mektep partasyna otyrady. О́kinishtisi, 1-synypqa qabyldanǵan oqýshylardyń ata-analarynyń basym bóligi orys tilin tańdapty (57 paıyzy).
Samal Ospanqyzy orta mektepterde áleýmettik qorǵalmaǵan otbasylardan shyqqan 13 117 oqýshy bar ekenin, jańa júıe boıynsha olardyń árqaısysynyń esepshotyna 19 tamyzdan bastap Pavlodar oblysynda bekitilgen eń tómengi kúnkóris deńgeıinen tómen emes mólsherde, ıaǵnı 43 616 teńgeden aqshalaı qarajat aýdarylyp jatqanyn da eske saldy. «Mektepke jol» aksııasy aıasynda qazirge deıin 4 myńdaı balaǵa jalpy somasy 20 mln-nan astam teńgeniń kómegi kórsetilipti. Aımaǵymyzdaǵy qalalar men aýdandarda 27 tamyz kúni mektep taýarlarynyń aýqymdy jármeńkesi uıymdastyrylady dep josparlanǵan.
Pavlodar oblysy