Qyzylordada káriz qudyǵyna túsip ketken 2 jasar balany aman alyp qalǵan 15 jastaǵy Arman Amanjolovty tártip saqshylary marapattady, dep habarlaıdy Egemen.kz Qyzylorda qalalyq IID baspasóz qyzmetine silteme jasap.
Jasóspirimdi qalalyq ishki ister bóliminiń bastyǵy Ábdibek Janazarov qabyldap, kórsetken batyldyǵy úshin alǵys bildirdi. Qurmet gramotasy men qol saǵaty saltanatty túrde tabys etildi.
Eske sala keteıik, 19 tamyzda Qyzylordada tórt metrlik káriz qudyǵyna túsip ketken eki jasar balany kezdeısoq ótip bara jatqan jasóspirim qutqaryp qalǵan edi.
Arman Qyzylordaǵa M.Ihsanov atyndaǵy Qyzylorda polıtehnıkalyq kolledjine túsý úshin kelgen. Tańdaǵan mamandyǵy - elektrık. Ol kópbalaly otbasynan shyqqan jigit. Aldynda eki ápkesi, eki aǵasy bar Arman úıdiń kenjesi eken.