Qazaqty qalaı jaqsy kórý kerektigin kórkemónerde Qasteev úıretti. Maǵan, sizge, oǵan… Qaı ulttyń bolsyn ózine tán boıaýy bolýy zańdylyq. Sol qońyr boıaýdy alǵash qoldanǵan suńǵyla sýretker edi. Beıneleý óneriniń beımálim álemine aýyl balasynyń armanyn jazdy. Joq, jazyp qana qoıǵan joq, kóshpendi halyqtyń ǵalamat ǵumyrynan syr sýyrdy.
Uly sýretshi Ábilhan Qasteev nesimen áli kúnge oqýlyqtyń betinen túspedi dep oılaısyz? Nege aldymen qazaq balasy Qasteevke qarap boı túzeýi kerek? Sebebi onyń shyǵarmalarynda ult rýhynyń júregi soǵyp tur. Sol som júrektiń dúrsilin sezgen oqýshy el men jerge degen súıispenshiliginen lázzat alady. Ol lázzat – dúnıedegi eń asyl lázzat. Árbir kompozısııasynyń ishinde qazaq júredi. Demi, tynysy, qımyly, kıimi, jupary, izi bári-bári kózge anyq, kóńilge tanys kórinedi. Senbeseńiz, qarańyzshy…
Qylqalam sheberiniń 1936 jyly jazǵan «Kolhozdyń sút fermasy» kartınasy. Bul kórinisterdiń shynaıylyǵy sonshama, bir sát ózińizdi sol bir qaımaǵy buzylmaǵan, tamyljyǵan tabıǵat qushaǵynda turǵandaı sezinetinińiz bar. Syńsyǵan ný orman, gúl kómkergen shalǵyndy alqap, syldyraı aqqan tuma bulaq... bári-bári de janyńa sonshalyqty jaqyn kórinister.
Ertede qazaq topyraǵynyń qaı pushpaǵyna tabanyńyz tıse de aldyńyzdan dál osyndaı sulý tabıǵat syzylyp shyǵa keletin. Ol jyldary Tabıǵat-ana kelbetine áli qaıaý túse qoımaǵan-dy. Qasteev polotnolaryndaǵy álgi kórinister – sondyqtan da kózge ystyq, kóńilge jaqyn. Al sýretshi keıipkerleriniń júzderi jarqyn, qanaǵatshyl, táýbeshil keıipte beınelengen. Adam janynyń eń izgi, eń aıaýly mezetinen jyr órip, tús berip, kompozısııany shıryqtyra túsken.
Bul – qaıtalanbas Qasteev! Baıyrǵy qazaq ómiriniń qyz-qyz qaınaǵan shaǵy, albyrt kúnniń aspanynda terbelgen tirshilik qol bulǵap turǵandaı. Tabıǵattyń qushaǵynda balqyǵan tiri sýret.