Bolgarııanyń bas shahary – Sofııada ótken jastar arasyndaǵy álem birinshiligi aıaqtalǵan soń dańqty balýan, bilikti bapker, Qazaqstan jáne Azııa kúres federasııalarynyń prezıdenti, Birikken kúres áleminiń (UWW) bıýro múshesi Dáýlet Turlyhanov Almatydaǵy «Dostyq» sport kesheninde BAQ ókilderiniń basyn qosyp, kúni keshe ǵana ótken jarysty qorytyndylady. Sonymen qatar ol jyl basynan beri atqarylǵan jumystary jaıynda baıandaı kele, osy salada qordalanyp qalǵan keıbir máselelerge de keńinen toqtaldy.
Jer-jahannyń jalyndy jastarynyń basyn qosqan jarysta Qazaqstan quramasy jeti júlde alǵany jaıynda biz buǵan deıin de habarlaǵanbyz. Tarqatyp aıtsaq, erkin kúresten ótken dodada Mereı Bazarbaev (57 kılo) qola medal ıelendi. Áıelder kúresi saıysynda Altyn Shaǵaeva (53 kılo) men Anastasııa Panasovıch (72 kılo) kúmispen kúptelse, Mádına Aman (59 kılo) qolaǵa qol sozdy. Grek-rım kúresi sheberleriniń básekesinde Iýsýf Masıev (97 kılo) ekinshi oryn alsa, Maqsat Saılaý (87 kılo) men Dinmuhamed Qoshqar (67 kılo) úshinshi satyǵa taban tiredi.
– Bolgarııa jarysty óte joǵary deńgeıde uıymdastyrdy. Elimizdiń jastar quramasy da jaqsy óner kórsetti. Biraq biz altyn alýdy kózdegen edik. О́kinishke qaraı, bul joly balýandarymyzǵa bas júlde buıyrmady. Aldaǵy ýaqytta jattyqtyrýshylarmen birlese otyryp, osy olqylyqtardyń ornyn toltyrý úshin barynsha kúsh salamyz. Jalpy alǵanda, jastardyń jeńiske degen erekshe qulshynystary kóńilimnen shyqty. Endi osy jarysta júlde alǵan jigitterdi ulttyq qurama sapyna qabyldaımyz. Sóz oraıy kelgende, olqy soǵyp turǵan tustarymyzǵa toqtala ketkim keledi. Shyny kerek, Olımpııa men Azııa oıyndary jáne basqa da baıraqty básekelerde oljaǵa kenelemiz dep júrip bizder jastarǵa tıisti kóńil bólmegen ekenbiz. Rezerv máselesin nazarymyzdan tys qaldyryppyz. Bapkerlerdiń de jaǵdaıy máz emes. Olar jarysqa nemese jattyǵý jıynyna barý úshin árkimniń aldynda alaqan jaıýǵa májbúr. Barlyǵy da qarajat máselesine kelip tireledi. Sportshynyń sheberlik deńgeıi ósý úshin oqý-jattyǵý jıyny tolyqqandy ótýi kerek. Ár salmaqta keminde bes-alty balýan bir-birimen kúsh synasýǵa tıis. Al bizde barlyq oblys jıyndarǵa tolyq quramda qatysa almaıdy. Jarystardyń jaǵdaıy da solaı. Máselen, taıaýda Túrkııada aıaqtalǵan Islam yntymaqtastyǵy oıyndarynda grek-rım kúresinen básekeler 10 salmaq dárejesi boıynsha ótse, bizdiń elden tórt balýan ǵana qatysty. Bul durys emes. Buqaralyq pen básekelestik bolǵan jerde ǵana nátıje bolatynyn qaperden shyǵarmaǵan jón. Qazirgi kezde barlyq oblys ortalyqtarynda zaman talabyna saı sport ǵımarattary salynyp, Olımpıadalyq daıarlaý ortalyqtary men sporttaǵy daryndy balalarǵa arnalǵan mamandandyrylǵan mektep-ınternattar jumys istep jatyr. Ol jerlerde qolaıly jaǵdaıdyń barlyǵy jasalǵan. Soǵan qaramastan, bári birdeı jaqsy nátıje kórsete almaı júr. Osyǵan baılanysty men Qazaqstan Respýblıkasy Premer-Mınıstriniń orynbasary Eraly Toǵjanov pen Mádenıet jáne sport mınıstri Dáýren Abaevpen kezdesýdi kózdep otyrmyn. Sport komıteti men óńirlerde osy salaǵa bólinetin qarajattyń qalaı jumsalyp jatqany jaıynda másele kótergim keledi. Soǵan arnaıy revızııa jasaýdy suraımyn. Barlyq jaǵdaıdy tekserip, aq-qarasyn anyqtap alýǵa tıispiz, – deıdi Dáýlet Bolatuly.
Sonymen qatar Dáýlet Turlyhanov bıyl ózderi ótkizgen jáne qazaqstandyq balýandar qatysqan jarystar jaıynda tolyq esep berdi. Jasóspirimder men jastar býyny arasyndaǵy eń iri elishilik dodalar men qurlyq jáne álem birinshilikteri óz máresine jetti. Endi jerlesterimiz 10-18 qyrkúıek aralyǵynda Serbııanyń astanasy – Belgradta jalaýy jelbireıtin álem chempıonatyna qatysýdy kózdep otyr. Sol jarysta Qazaqstannyń balýandary tabysty óner kórsetip, jeńis tuǵyrynyń eń bıik satysyna kóteriledi dep úmittenemiz.