«Almaty» telarnasynda qaladaǵy bilimdi oqýshylar baq synaıtyn «IQ Almaty» ıntellektýaldy shoýy kórermenge qaıta jol tartady, dep habarlaıdy Egemen.kz.
Baǵdarlamanyń maqsaty – mektep túlekteriniń jańa ómir belesine qadam jasaýyna múmkindik berý. Jobaǵa Almaty qalasy mektepteriniń 11-synyp oqýshylary iriktelip alynady. Ár kezeńde úzdikterdi anyqtap otyratyn joba 5 kezeńnen turady.
«Bul – zamanǵa saı qajetti ári paıdaly joba. Ádettegi oıyn-saýyq jobalaryna uqsamaıdy. Urpaqty damytýǵa qosatyn úlesi kóp. Jastar ol – ulttyń avangardy desek bolady. 2020 jyldan beri bilimge kóp kóńil bólinip keledi. Álem boıynsha bilimdi adamdardyń tasy órge domalap, bolashaq tek bilimmen baılanystyrylyp otyr. Sol sııaqty qazaq elinde de bilim salasyn damytý, jańalyq ashýǵa talpynatyn jastarǵa qoldaý kóretý mańyzdy. Osy turǵydan alǵanda «IQ Almaty» baǵdarlamasy jastarǵa úlken ómirge qadam jasaýǵa múmkindik beredi», dedi shef-redaktor Baıan Baqkeldi.
Al 16 jasynda osyndaı baǵdarlamaǵa qatysqan joba júrgizýshisiniń aıtýynsha, ıntellektýaldy saıys urpaq tárbıesine, bilim sapasynyń artýyna zor yqpal etedi.
«2009 jyly qatysqanmyn. 16 jasta edim. Joba kerek. Elimizdi damytýǵa, jastardy durys jolǵa salýǵa, baǵyt berýde óz reıtıngisin kórsetedi. Júzden júırik, myńnan tulpar – bilimdi jastar qatysady. Osyndaı zııatkerlik baǵdarlamanyń kóbeıgeni qýantady. Al ony júrgizý men úshin jaýapkershilik ári mártebe», dedi baǵdarlama júrgizýshisi Dáýlet Muqaev.
Bes kezeńnen turatyn irikteýden ótken 2 oqýshy joǵarǵy oqý ornynda oqýǵa múmkindik alady. Jobanyń tıimdiligi sol, JOO bilimdi stýdentti qabyldasa, túlekter tegin oqý arqyly jarqyn bolashaǵyna joldama alady. Sondaı-aq baǵdarlama barysynda qala mektepteriniń deńgeıin de anyqtaýdyń múmkindigi zor. Joba bir jaǵy, mektep baǵdarlamasyndaǵy suraqtardy qoıý arqyly kórermendi de qyzyqtyrsa, ekinshi qyry, bastaýysh ne orta býyn oqýshylaryn sabaqty jaqsy oqýǵa yntalandyrady.
«IQ Almaty» baǵdarlamasy 10 qyrkúıekte efırge shyǵady.