Prezıdent Qasym-Jomart Toqaev Parlament palatalarynyń birlesken otyrysynda memleket mıllıonnan astam azamattyń alǵashqy medısınalyq-sanıtarlyq kómekke qol jetkizýin qamtamasyz etetinin habarlady, dep jazady Egemen.kz.
«Men kelesi jyldan bastap elimizdiń aýyl turǵyndarynyń qajettilikterine baǵyttalǵan ulttyq jobany iske asyrýdy bastaý týraly sheshim qabyldadym. Eki jyl ishinde búginde medısınalyq mekemeleri joq 650 aýylda medısınalyq jáne feldsherlik-akýsherlik pýnktter salynyp, tolyq jaraqtandyrylady. Osylaısha, memleket mıllıonnan astam azamattyń alǵashqy medısınalyq-sanıtarlyq kómekke qol jetkizýin qamtamasyz etedi», dedi Memleket basshysy bıylǵy Joldaýynda.
Prezıdenttiń aıtýynsha, Ulttyq joba aıasynda 32 aýdandyq aýrýhana jańǵyrtylyp, aýdanaralyq kópsalaly mekemeler bolyp qaıta qurylady. Sondaı-aq olarda ınsýlt ortalyqtary, hırýrgııa, reanımasııa jáne ońaltý bólimsheleri de paıda bolady.
«Bul tórt mıllıonnan astam azamat úshin medısınalyq qyzmetterdiń sapasyn arttyrýǵa múmkindik beredi. Budan basqa, telemedısına damytylady, ol shalǵaı aýdandardyń turǵyndaryna bilikti kómek kórsetýge jol ashady», dep qosty Qasym-Jomart Toqaev.