Memleket basshysy Qasym-Jomart Kemeluly Toqaevtyń Qazaqstan halqyna jarııa etken Joldaýyn erekshe yqylaspen qabyldadym. Prezıdent elimizdiń tolyqqandy damýy úshin jasalatyn qadamdardy qadap turyp aıtty. Túıindi máseleler Joldaýda naqty kórsetildi. Atap aıtqanda, otandyq bıznesti qoldaý, halyqty áleýmettik qorǵaý jáne ekonomıkany damytý jaıyna keńinen toqtaldy.
Keıingi kezde halyqqa salmaq túsirip otyrǵan baǵa turaqsyzdyǵyn synǵa alyp, daǵdarystan shyǵý joldary basqarý júıelerin durys jolǵa qoıýǵa tikeleı qatysty ekenin ańǵartty. Jergilikti bılik qyzmetiniń tıimdiligi budan bylaı tikeleı baǵalanýy kerektigin aıta kelip, burynnan kóterilip júrgen aýyl ákimderin saılaý týraly bastama kóterdi.
Eger Joldaýda kóterilgen mindetter júıeli túrde oryndalatyn bolsa qazaqstandyqtardyń turmys sapasy, ál-aýqaty artatyny ras.
Memleket basshysy Joldaýda «Ult jospary – bes ınstıtýsıonaldyq reformany» negizgi baǵdar etýdi usyndy. Bir qýanǵan jerimiz, jerdi sheteldikterge satýǵa tyıym salynatyny aıtyldy. Budan bylaı bos jatqan jerlerde aýylsharýashylyǵyn jandandyryp, jer ónimderin tolyqqandy ekonomıkalyq aınalymǵa shyǵarý boıynsha naqty tapsyrma berdi. Qazaqstannyń ekonomıkalyq baǵyty jeti negizge súıenýi kerek jáne onyń nátıjesi halyqtyń ál-aýqatyn jaqsartýǵa jumys isteýge tıis. Bul úshin kásipkerlikke jetekshi ról berip, jańa kásipkerlerdiń naryqqa enýine jol ashyp, jaǵdaı jasalýy mindet. Ádil básekelestik – aıtylǵan baǵyttardyń qatarynda ekenin taǵy da aıta ketý kerek. Sol sııaqty, óndiristi arttyrý, kúrdeli tehnologııalyq ekonomıkaǵa ıek artý; adam kapıtalyn damytyp, ınvestısııa men bilimniń jańa túrin qalyptastyrý; ekonomıkany jasyldandyryp, qorshaǵan ortany qorǵaý; memlekettiń negizdelgen sheshimder qabyldap, qoǵam aldynda sol úshin jaýap berýin qamtamasyz etý de negizgi basymdyqtar qataryna kiretinin bildik. Prezıdent Qasym-Jomart Toqaev: «Ishki jalpy ónimniń abstraktili ósimimen jurtty qýanta almaımyz. Halyqqa turaqty jumys oryndary, qolaıly jol, aýrýhanalar men mektepter, sapaly azyq-túlik kerek. Ekonomıkalyq reformalar azamattardyń tabysyn arttyryp, turmys sapasynyń joǵary standartyn qamtamasyz etkende ǵana ózin ózi aqtap, qoldaýǵa ıe bolady. Osyny árdaıym este ustaýymyz qajet», dedi.
Joǵaryda aıtyp ótkendeı, Joldaýda el basshysynyń agrobıznesti qolǵa alyp, sol salaǵa ınvestısııa tartý kerek jáne «jer sheteldikterge satylmaıdy» degen eki basym sheshimi qazaqstandyqtardyń kóńilinen shyqty. Degenmen, aýyl sharýashylyǵy salasynda mamandar tapshylyǵy bar ekeni ras. Kadrlar daıarlaý, «Bolashaq» grantyn aýylsharýashylyq mamandyqtaryna bólý syndy máselelerdi de qolǵa alý kerek. Bıyl bilim men ǵylymǵa memleketimiz úlken kóńil bólip, mektep túlekteriniń grantqa kóptep túsýine jaǵdaı jasalǵany ábden quptarlyq sheshim. El bolashaǵy jas mamandar arqyly qalyptasady. Sondyqtan Joldaýdaǵy «Jas ǵalymdardy» qoldaý maqsatynda qosymsha 1000 grant bólý tapsyrylǵany da kóptiń kóńilinen shyqty.
Aýyldyq okrýg ákimderin kelesi jyldan bastap jergilikti halyq saılaıdy, ol úrdis oblystyq deńgeıge kóteriledi. Muǵalimder men dárigerlerdi qoldaý barysynda da túrli baǵdarlamalar usynylyp, nátıjesinde jalaqylary da kóterilip jatyr. 2025 jylǵa deıin elimizde jıyrma aýrýhana salýdy da tapsyrdy.
El Prezıdentiniń bul Joldaýy daǵdarystan alyp shyǵatyn aıqyn basymdylyqtardy naqty kórsetip bergenine kýá boldyq. Endigi jerde osy basymdylyqtardy qaltqysyz júzege asyrý halyq pen bıliktiń óz qolynda. Birlikpen tize qosyp, el bolashaǵyn oılaıtyn kez keldi. «Altaý ala bolsa, aýyzdaǵy ketedi, tórteý túgel bolsa, tóbedegi keledi» dep, dana halqymyz jańsaq aıtpasa kerek.
Elimiz aman, jurtymyz tynysh bolsyn!
Sát TOQPAQBAEV,
zapastaǵy general-polkovnık