Premer-Mınıstr Álıhan Smaıylov «ArselorMıttal» kompanııasynyń atqarýshy tóraǵasy Lakshmı Mıttalmen kezdesý ótkizdi, dep habarlaıdy Egemen.kz.
Taraptar kompanııanyń óndiristi jańǵyrtý jáne eńbek qaýipsizdigin arttyrý jónindegi josparlaryn, shyǵarylatyn ónimdi ishki naryqqa jáne kórshi elderge jetkizý máselelerin, sondaı-aq metall ónimderin qaıta balqytýdyń neǵurlym joǵary deńgeıine kóshý perspektıvalaryn talqylady.
Sondaı-aq Lakshmı Mıttal kompanııanyń aldaǵy jyldary bolat quıý jáne taý-ken aktıvterin jańǵyrtýǵa qomaqty qarajat salýdy josparlap otyrǵanyn habarlady. Sonymen qatar qyzmetkerlerdi oqytý jáne olardyń qaýipsizdigin qamtamasyz etý máselelerine kóbirek kóńil bólý josparlanyp otyr.
Premer-Mınıstr óndiristiń qazirgi qarqynyn saqtap, shyǵarylatyn ónim nomenklatýrasyn keńeıtý jáne týyndaǵan máselelerdi sheshý boıynsha Indýstrııa jáne ınfraqurylymdyq damý mınıstrliginiń basshylyǵymen barynsha tyǵyz jumys isteý qajettigine nazar aýdardy.
«О́nerkásiptik qaýipsizdik óte mańyzdy másele bolǵandyqtan, oǵan erekshe nazar aýdarý kerek. Osyǵan baılanysty óndiristi damytý jáne qyzmetkerlerdi mamandandyrylǵan oqytý boıynsha kompanııanyń ınvestısııalyq josparlaryn quptaımyz», dedi Álıhan Smaıylov.