Nur-Sultan qalasynyń ákimi Altaı Kólginov óziniń Instagram-daǵy paraqshasynda qala turǵyndarynyń azamattardy jeke qabyldaý kezinde qandaı suraqtar qoıǵanyn aıtty, dep habarlaıdy Egemen.kz elorda ákimdiginiń resmı saıtyna silteme jasap.
«Biz apta saıyn azamattardy qabyldaýdy jalǵastyramyz. Qalalyqtardan kelip túsetin máselelerdiń mańyzdy bóligi - turǵyn úı. Memleket basshysynyń tapsyrmasy boıynsha jeńildetilgen qoljetimdi turǵyn úı salýdy jalǵastyramyz, jastarǵa arnalǵan arnaıy turǵyn úı baǵdarlamasyn iske qostyq, turǵyn úı sertıfıkattarynyń somasyn ulǵaıttyq, turǵyn úı baǵdarlamalaryna qatysýshylardyń sanatyn keńeıttik jáne t. b. », dep jazdy Altaı Kólginov.
Ákimniń aıtýynsha, qalada 200-den astam apattyq úı bar. Sońǵy úsh jylda apatty úılerden 700-ge jýyq otbasy kóshirildi. Bıyl taǵy 300-den astam otbasyn kóshirýdi josparlap otyrmyz. Elorda Damý baǵdarlamasynyń bastalýynan bastap apatty úılerden 4 myń 200 otbasy kóshirildi.
«Sonymen qatar, turǵyn úı keshenin jóndeý jáne lıftilerdi aýystyrý boıynsha jumystardy júrgizemiz. Mysaly, azamattardyń qabyldaýynda turǵyndar lıftilerdi aýystyrý máselesi boıynsha júgindi (Kúıshi Dına kóshesi, Almaty aýdany). Úıdegi lıftilerdiń bir bóligi aýystyryldy, basqalary boıynsha jumystar júrgizilip jatyr. Buǵan deıin biz 80 lıftini jańarttyq, bıyl taǵy 40 lıftini jańartýdy josparlap otyrmyz. Kelesi jyly 30 lıft aýystyrylady dep josparlanyp otyr», dep jazdy elorda ákimi.