Belgradta ótip jatqan álem chempıonatynda grek-rım kúresi sheberleri alǵashqy júldelerdi sarapqa saldy. Tórt salmaq dárejesi boıynsha ótken básekelerde, ókinishke qaraı, Qazaqstan qurama komandasynyń múshelerine birde-bir júlde buıyrmady.
55 kılo salmaqta kúsh synasqan Amanǵalı Bekbolatov qola medal úshin básekeniń birinshi kezeńinen keıin ózbekstandyq Jasýrbek Ortıkboevty 5:0 esebimen utyp jatyp, jeńisti ýysynan shyǵaryp aldy. Bul rette qandasymyzdyń úzilisten keıin óreskel qatelikke boı aldyryp, qarsylasyna birden tórt upaı berip qoıǵanyn aıta ketýge tıispiz. Odan keıin Ortıkboev qarqynyn báseńdetpeı, upaıyn taǵy da eseledi. Nátıjesinde, ózbek balýany jeńis tuǵyryna kóterilse, bizdiń jigit besinshi orynda qalyp qoıdy. Osy salmaqtyń bas júldesin kórshiles qos memlekettiń ókilderi – grýzııalyq Nýgzarı Sýrsýmııa men ázerbaıjandyq Eldenız Azızlı sarapqa saldy. Bul aıqasta Azızlıdiń asyǵy alshysynan tústi.
Qos jerlesimiz jubanysh básekelerinde baq synady. 72 kılo salmaq dárejesindegi Ibragım Magomadov bolgarııalyq Devıd Dımıtrovty 4:0 esebimen utyp, úshinshi oryn úshin talasý múmkindigine ıe boldy. Bul mejede onyń joly Eýropa birinshiliginiń qola júldegeri, túrkııalyq Seljýk Kanmen qıysty. Ibragım da alǵashynda úsh upaıdy enshilep, alǵa shyqty. Báseke qyzǵan tusta Kan tarazy basyn teńseltip ketti. Aqyrynda Anadoly eliniń ókili qola medaldy moınynda jarqyratsa, jerlesimiz jer sıpap qaldy. Chempıondyq táj úshin tartysta serbııalyq Álı-Feızolla Arsalan ázerbaıjandyq Ýlvı Ganızadeden aılasyn asyrdy.
77 kılodaǵy Temirlan Shadýkaev pen Malhas Amoıan arasyndaǵy jubanysh beldesýinde teń esep tirkeldi – 2:2. Sońǵy upaıdy armenııalyq sportshy ıelengendikten, jeńis sonyń enshisine jazyldy. Bul salmaqta qyrǵyzstandyq Aqjol Mahmýtov majarstandyq Zoltan Levaıdy bas-aıaǵy eki mınýt aralyǵynda aıqyn utty. Serbııanyń namysyn qorǵap júrgen grýzııalyq balýan Zýrab Datýnashvılı men Danııanyń týy astynda óner kórsetken cheshen jigiti Týrpan Bısýltanov 87 kılo salmaq dárejesiniń altyn medal úshin talasty. Bul tartys Datýnashvılıdiń jeńisimen aıaqtaldy.
Odan keıin taǵy tórt balýanymyz bozkilemge shyqty. 63 kılodaǵy Ǵalym Qabdynasyrov tusaýkeser kezdeýinde bolgarııalyq Nıkolaı Ivanov-Vıchevten (0:8) oısyraı utyldy. 67 kılodaǵy Din-Muhamed Qoshqar fransııalyq Mamadassa Sıllaǵa (5:9) ese jiberdi. 82 kılodaǵy Dıas Qalen men 97 kılodaǵy Islam Ýmaev alǵashqy aınalymda О́zbekstannyń ókilderimen aıqasty. Olardyń ekeýi de tym azýly qarsylastar edi. Atap aıtsaq, Jalaǵasbaı Berdimuratov – álem chempıonatynyń qola júldegeri jáne Azııa chempıony. Rýslan Assakalov – álem chempıonatynyń eki dúrkin júldegeri, Azııanyń úsh dúrkin chempıony, Azııa oıyndarynyń jeńimpazy. Bıylǵy jyldyń tamyz aıynda byltyr ekeýi de Islam yntymaqtastyǵy oıyndarynda altyn tuǵyrǵa kóterilip, jaqsy babynda ekenderin baıqatqan edi. О́kinishke qaraı, jerlesterimizdiń áıgili sportshylarǵa áli jetpedi. Dıas (4:5) Berdimuratovtan utylsa, Islam (0:9) Assakalovqa laıyqty qarsylyq kórsete almady. Nátıjesinde, Dıas Qalen ǵana jubanysh beldesýge qatysý múmkindigin saqtap qaldy.