Qazaqstan Prezıdenti Qasym-Jomart Toqaev elordada ótip jatqan Álemdik jáne dástúrli dinder kóshbasshylarynyń VII sezinde sóz sóılep, din kóshbasshylaryna iltıpat bildirdi, dep habarlaıdy Egemen.kz.
«Qurmetti din lıderleri, qurmetti qonaqtar, hanymdar men myrzalar! Qonaqjaı qazaq jerine qosh keldińizder! Biz úshin álemdegi eń yqpaldy kóshbasshylardy elordada jınap, dıalog júrgizý úlken mártebe. Qazaqstanǵa alǵash ret memlekettik saparmen kelgen Vatıkan men Katolık shirkeýiniń basshysy Rım Papasy Fransıskke óz qurmetimdi bildiremin. Siz dinder men halyqtar arasyndaǵy ózara túsinistikti nyǵaıtýǵa zor úles qostyńyz.
Men elimizge ejelgi ıslam ýnıversıtetiniń joǵarǵy ımamy ál-Azhardyń qurmetti doktory, sheıh Ahmed at-Taıebtiń kelgenine qýanyshtymyn. Qazaq halqy sizdi qazirgi musylman áleminiń kórnekti qaıratkeri retinde baǵalaıdy. Siz adamgershilik qundylyqtardy dáripteýge ólsheýsiz úles qostyńyz», dedi Qasym-Jomart Toqaev forýmnyń ashylýynda.
Prezıdent sondaı-aq Orys Pravoslavıe shirkeýiniń ókilderin de qarsy aldy.
«Men Orys Pravoslavıe shirkeýiniń joǵary ókilderin qarsy alýǵa qýanyshtymyn. Pravoslav hrıstıandary Qazaqstandaǵy birlik pen kelisimdi nyǵaıtýǵa qomaqty úles qosýda. Men Máskeý jáne Búkil Reseı Patrıarhy Kırıllmen jaqynda bolǵan áńgimemizdi jyly lebizben eske alamyn, ol konfessııaaralyq dıalogty damytýdaǵy elimizdiń kúsh-jigerine qoldaý bildirdi. Bizdiń aramyzda Izraıldiń Ashkenazı ravvıni Devıd Laý jáne sefardı ravvıni Djozef bar. Biz elimizdiń evreı qaýymdastyǵynyń ókilderimen birge bul saparǵa erekshe mán beremiz. Osy shaqyrýdy qabyldap, Qazaqstanǵa kelgenińiz úshin alǵysymdy bildiremin. Forým qatysýshylary álemde beıbitshilikti saqtaýǵa jáne órkenıetaralyq dıalogty nyǵaıtýǵa múddeli», dep túıindedi Memleket basshysy.