«Qarasaz, qara shalǵyn óleńde óstim, Jyr jazsam oǵan, jurtym, eleńdestiń. О́lse óler Muqaǵalı Maqataev, О́ltire almas alaıda óleńdi eshkim», – dep jyrlaǵan aqıyq aqynnyń óleńderin balaýsa jas ta, eńkeıgen qarııa da jatsynbaı oqıdy. Shaıyrdyń kelbetin zaman talabyna saı keskindeý, ol jaıly júrek terber estelikterdi kórermen kóz aldynda qaıta tiriltý naǵyz sahna sheberleriniń qolynan ǵana keleri haq.
Muqaǵalıdaı bolmysy bólek, jyrlarynyń jaratylysy kúrdeli aqyndy teatr sahnasyna júreksinbeı alyp shyǵýǵa ilýde bir óner ujymynyń bel baılaıtynyn kórip júrmiz. J.Aımaýytov atyndaǵy Pavlodar oblystyq qazaq mýzyka-drama teatry byltyr aıtýly tulǵanyń 90 jyldyǵyna oraı «Esińe meni alǵaısyń» atty mýzykaly-poetıkalyq keshtiń tusaýyn kesip, teatrda eki kún qatarynan anshlag jasaǵan edi.
Hantáńiriniń muzbalaǵy Muqaǵalıdyń sondaǵy shynaıy beınesin kerekýlik jurt jyly qabyldaǵan bolatyn. Bıyl atalǵan óner ujymy jańa maýsymnyń shymyldyǵyn sol týyndymen túrdi. Aqyn taǵdyryndaǵy qat-qabat qıynshylyqtar men qaıǵy-muńǵa qurylǵan qoıylymǵa bul joly da jergilikti ónersúıer qaýym taıly-taıaǵy qalmaı jınaldy.
Keshte aqynnyń sózine jazylǵan «Ana, sen baqyttysyń», «Kúreń kúz», «Bópem-aı», «Qumǵan alǵan», «Men dep oıla», «Qazaǵym-aı», «Saryjaılaý», «Otan», «Qarasazym-aı» jáne taǵy da basqa ánder sımfonııalyq orkestrdiń súıemeldeýimen shyrqaldy. Muqaǵalı obrazyn byltyrǵy premeradaǵydaı akter Baýyrjan Manatbek somdady. Dramatýrgııasyn Nurken Turlybek jazǵan bul qoıylymda zamanaýı jańashyldyq, izdenis baıqalady. Bir saǵattan astam ýaqytqa sozylatyn kesh kórermendi birden baýrap, jalyqtyrmaıtyn sazdy, saǵynyshty aýanda órbıdi. Aqynnyń názik janyn túsiný úshin bul keshti poezııany súıip oqıtyn qaýym mindetti túrde kórýi kerek dep túıdik. Qaraóleńniń qudireti arqyly qazaq poezııasynda ózindik qaıtalanbas qoltańbasyn qaldyryp ketken Muqaǵalı jaıly bul qoıylym keleshekte teatr repertýaryndaǵy orny bólek, júgi salmaqty dúnıeniń birine aınalatynyna sendik.
Teatr basshysy Arman Temirbek ózderiniń aldaǵy kúnderi Astana men Qaraǵandyǵa gastroldik sapar josparlap otyrǵandaryn aıtty. Odan soń Oral qalasynda bolatyn monospektalder festıvaline Shekspırdiń «Korol Lırimen» qatyspaq nıette eken.
– Bıyl kórermenderimiz úshin qarasha aıynda «Premeralar aptalyǵyn» ótkizbekpiz. Sonyń aıasynda 3 birdeı spektakldiń tusaýyn kesemiz. Ázirshe tusaýkeser josparda tur, biraq onyń sahnalyq árlenýine, ártisterdi daıarlaýǵa biraz kúsh jumsaýǵa týra keletin sııaqty. Sondaı-aq Almatydan teatr synshylaryn shaqyryp, sahnaǵa alǵash ret shyǵarǵaly otyrǵan spektalderimizdi taldatyp alsaq deımiz. Osy maýsymda qatarymyzǵa jańadan 2 jas akter qosylady dep kútip otyrmyz, – deıdi teatr dırektory.
Aıtýynsha, óner mekemesinde biraz jyldan beri qordalanyp qalǵan máseleler bar. Ártister el aralaǵanda júrip-turatyn shaǵyn avtobýs óte eski, alys jolǵa jaramsyz. Onyń ústine teatr qyzmetkerlerin baspanamen qamtý máselesi ótkir tur. Bir jyldary 9 bólmeden turatyn jataqhana berilgen eken. Aıadaı ǵana bólmeler otbasyn quryp, úıli-barandy bolǵandarǵa tarlyq etýde. Sondyqtan oblys basshylyǵy bul máselege nazar aýdarsa eken degen tilegin jetkizdi. Jýyrda oblystyq máslıhattyń hatshysy Ernur Áıtkenov bastaǵan bir top halyq qalaýlysy arnaıy kelip, mundaǵy jaǵdaımen tanysyp ketken kórinedi. Depýtattar tobynyń sol saparynda qaýzalǵan máseleler boıynsha nátıje shyǵaryna senip otyr.
Sóz arasynda Arman Temirbek oblystardaǵy teatr qyzmetkerleriniń eńbekaqysy óte tómen ekenin, bıyldan ulttyq mártebege ıe respýblıkalyq teatr akterleriniń jalaqysy artyp jatqany jýyq arada óńirlerge de oń tájirıbe bolyp engizilse eken degen úkili úmitin de jetkizdi. Az ǵana jalaqyǵa akterler turmaq, teatrdyń tehnıkalyq qyzmetkerlerin ustap otyrý da qıyn sharýa kórinedi. Bul buıymtaılardy oblystyń mádenıet salasyna jaýapty sheneýnikter eskeredi degen oıdamyz.
Pavlodar oblysy