О́mirin ult taǵdyrynyń ósip-órkendeýine baılaǵan tulǵanyń aıtqan sózi, júrgen joly, istegen isi jastarǵa qashanda úlgi-ónege. Sondaı ónegeli jannyń biri Asanbaı Asqarovtyń esimin el asqan súıispenshilikpen eske alatyny týraly áńgime kóp. «Basshy bolsań Asekeńdeı bol!» dep otyratyn kórinedi tamam tústiktiń jurty. Sol kisiniń ómiri men qyzmeti týraly Ortalyq memlekettik arhıv ázirlegen «Asanbaı Asqarov» atty eki tomdyq kitap shyqty jaqynda.
Jıyrma alty jyl boıy Jambyl, Ońtústik Qazaqstan, Almaty óńirlerin abyroımen basqarǵan Asanbaı Asqarov týraly, onyń ónegeli isteri haqyndaǵy materıaldardyń bári osynda. Tek qana maqalalar men ártúrli jazbalar ǵana emes, arhıvtik qujattar da qamtylypty. Sanaly ǵumyryn el ıgiligi jolyna sarp etken qoǵam qaıratkeri Dinmuhamed Qonaev syndy zańǵar tulǵanyń senimdi serigi bolǵanynyń ózi biraz jaıdan habar beredi. Qaı jerde qandaı qyzmet atqarsa da «ultqa, qazaqqa janashyrlyq kerek» degen sózdi murat tutqan tulǵanyń qaıratkerlik joly jastarǵa osyndaı eńbekter arqyly taraıtyny sózsiz. «Bireýden bireý alyp elge tarar» dep hakim Abaı tekke aıtpaǵan. «Krasnogor aýdanynyń birinshi hatshysy kezinde aýyl basshysy О́mirzaqovqa aıtyp Kenen Ázirbaevqa jańa úı salǵyzyp bergeni de el esinde. Al Jambyl oblysyn basqarǵan kezinde Qarataý, Jańatas ken oryndary ashyldy. Tipti búginde oblystyń atyn ıemdengen jyr alyby Jambyldyń eńseli eskertkishin de osy Asqarov ornatqan bolatyn», delingen kitaptaǵy bir málimette. Almatyda, taǵy basqa jerlerdegi ıgilikter salýǵa qalaı qol jetkizgenin bilý úshin qos tomdyqty paraqtaýǵa týra keledi.