Qasym-Jomart Toqaev Afrıka odaǵy men Eýropa Odaǵynyń birlesken tóraǵalyǵymen ótken Azyq-túlik qaýipsizdigi jónindegi jahandyq sammıtke qatysty, dep habarlaıdy Egemen.kz Prezıdenttiń baspasóz qyzmetine silteme jasap.
Jıynǵa Eýropalyq Keńestiń prezıdenti Sharl Mıshel, Ispanııa Premer-mınıstri Pedro Sanches, Kanada Premer-mınıstri Djastın Trıýdo, Senegal Prezıdenti Makı Sall, AQSh Memlekettik hatshysy Entonı Blınken jáne basqa da álemdik saıasatkerler qatysty.
Memleket basshysy búginde azyq-túlik qaýipsizdigin qamtamasyz etý álemdegi eń ózekti máselelerdiń biri ekenin atap ótti. Sondaı-aq 2019 jyly osy formatta ótken sońǵy kezdesýden beri azyq-túlik tapshylyǵyna tap bolǵan adamdardyń sany 135 mıllıonnan 345 mıllıon adamǵa deıin óskenine nazar aýdardy.
Qasym-Jomart Toqaev jahandyq azyq-túlik tapshylyǵymen kúresý úshin Qazaqstan aldaǵy ýaqytta óziniń aýyl sharýashylyǵy áleýetin paıdalanýǵa nıetti ekenin málimdedi. Prezıdent bizdiń elimiz astyq pen azyq-túliktiń basqa da negizgi túrleriniń senimdi jetkizýshisi bolyp qala beretinin aıtty.
Memleket basshysy ashtyqqa qarsy is-áreket jónindegi kúsh-jigerdi jandandyrýǵa shaqyrdy. Osy rette, Prezıdent Azyq-túlik qaýipsizdigi jónindegi ıslam uıymymen jáne óńirdegi BUU ınstıtýttarymen túrli satyp alý jobalary, sonyń ishinde Aýǵanstan qajettilikteri úshin yntymaqtastyqty keńeıtýge daıyn ekenin jetkizdi.
Prezıdent Qara teńiz astyq bastamasyn júzege asyrýdy jaqtap, azyq-túlik pen tyńaıtqyshtardy barlyq sanksııalar men shekteýlerden bosatýdyń, olardy kedeı elderge jetkizýdi qamtamasyz etýdiń mańyzdy ekenin atap ótti.
Qasym-Jomart Toqaev elimizdiń tranzıttik-kólik múmkindikterine, sonyń ishinde Transkaspıı halyqaralyq kólik dáliziniń áleýetine toqtaldy.
– Aldaǵy jyldary Qazaqstan arqyly júk tasymaldaý kólemi aıtarlyqtaı artady dep boljap otyrmyz. Qysqa qaraı Qazaqstan energııa resýrstary men asa mańyzdy shıkizat taýarlarynyń tapshylyǵyn azaıta alady, – dedi Memleket basshysy.
Prezıdent klımattyń ózgerýine jáne azyq-túlik júıeleriniń qurylymdyq turǵyda álsizdigine baılanysty syn-qaterlerge de toqtaldy. Sondaı-aq Qazaqstan halyqaralyq tranzıttik hab retinde jahandyq jáne turaqty jetkizý tizbegin qurýǵa qabiletti ekenin jetkizdi.
Qasym-Jomart Toqaev sózin qorytyndylaı kele, ótken ǵasyrdyń otyzynshy jyldaryndaǵy náýbet kezinde Qazaqstan ashtyq qasiretin bastan keshkenin, sondyqtan azyq-túlik problemalaryn sheshýge tolyq múddeli ekenin aıtty.