Qazaqstan Respýblıkasy Parlamenti Senatynyń Tóraǵasy Máýlen Áshimbaev Memleket basshysy Qasym-Jomart Toqaevtyń Túrkistan oblysynyń jurtshylyǵymen kezdesýine oraı feısbýk áleýmettik jelisinde jazba qaldyrdy, dep habarlaıdy Egemen.kz.
«Qazir búkil álem tolqyp tur. Geosaıası jaǵdaı shıelenisip, halyqaralyq ahýaldyń qıyndaı túskenin bárimiz kórip otyrmyz. Jahan jurty, shyn máninde, kúrdeli kezeńdi bastan ótkerýde. Osyndaı sátte memlekettilikti saqtaý, eldikti nyǵaıtý degen máselelerdiń mańyzy arta túsetini anyq.
Búgin Memleket basshysy Qasym-Jomart Kemeluly Toqaev Túrkistan oblysynyń jurtshylyǵymen kezdesýde osy jaıtqa nazar aýdaryp, turaqty ósip-órkendeýimiz úshin el birligi aýadaı qajet ekenin atap ótti. Prezıdentimiz aıtqandaı, birlik – beıbitshilik pen tynyshtyqtyń kepili», dep jazdy Máýlen Áshimbaev.
Sondyqtan Senat Tóraǵasy ár iste parasattylyq pen sabyrlyq tanytý elimizdiń amandyǵy men jerimizdiń bútindigi úshin asa mańyzdy dep esepteıdi.
«Qazirgi tańda elimizge kórshi memleketten kelip jatqandar týraly másele kóptiń kókeıinde júrgeni belgili. Soǵan baılanysty Memleket basshysy osy túıtkilge arnaıy toqtalyp, barlyq isti baıyppen talqylap, aqylmen sheshýimiz qajet ekenin aıtty. Mundaı jaǵdaıda tatýlyqqa taban tireı otyryp áreket etsek, utylmaıtynymyz anyq. Prezıdentimiz bul baǵyttaǵy jumystyń bári eń aldymen ulttyq múddemiz ben elimizdiń turaqtylyǵyn kózdeıtinin aıryqsha atap ótti.
Eń bastysy, búgingideı almaǵaıyp kezeńde birinshi kezekte bereke-birligimizge syzat túsirmeýimiz kerek. Bul – jurt bolyp jumylatyn mindet. Qazir memlekettiń tutastyǵyn saqtaý jolynda ult bolyp uıysatyn kezeń. Ony jahannyń búgingi jaı-kúıi anyq kórsetip otyr. Sondyqtan bul synaqtan da abyroımen ótip, aldymyzda turǵan barlyq maqsatty sátti júzege asyramyz dep senemiz», dep jazdy Máýlen Áshimbaev.