Parlament Májilisiniń Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev BUU Joǵarǵy komıssary Basqarmasynyń Ortalyq Azııadaǵy Bosqyndar isi boıynsha jaqynda taǵaıyndalǵan aımaqtyq ókili Barnard Doılmen kezdesti.
Júzdesý barysynda aımaqtyq jáne jahandyq qaýipsizdik máselelerine qatysty keń kólemde pikir almasyldy.
– Qazaqstan BUU Joǵarǵy komıssary Basqarmasynyń Ortalyq Azııadaǵy Bosqyndar isi boıynsha tıimdi yntymaqtastyqqa aımaqtyq deńgeıde daıyn. Sonyń bir kórinisi ótken jyly maýsym aıynda Almatyda halyqaralyq kóshi-qon jáne bosqyndardy qorǵaý máselesi boıynsha birlesip ótkizilgen mınıstrlik konferensııasy bolyp tabylady, – dep atap ótti óz sózinde M.Áshimbaev.
B.Doıl óz kezeginde Qazaqstannyń Ortalyq Azııa aımaǵy men álemdik deńgeıdegi rólin aıyryqsha baǵalap, el táýelsizdigin alǵaly az ýaqytta jetken osynsha jetistikter ultaralyq kelisim men beıbitshilikti saqtaýdyń, jaqsy zańdar men tıimdi basqarýdy jetildirip otyrýdyń nátıjesi ekendigin atap ótti.
Taraptar Ortalyq Azııa elderinde turatyndardyń, onyń ishinde Aýǵanstandaǵy bosqyndar máselesin sheshýde jańa joldardy izdeý baǵytynda kúsh biriktirý qajettigi týraly ortaq pikir bildirdi.
B.Doıl Qazaqstannyń Aýǵanstanǵa kórsetip otyrǵan jan-jaqty izgilikti jáne qarjylaı kómegi sol eldiń turaqtylyǵyna úlken kómek ekenin jetkizdi. Sonymen qatar, qazaqstandyq JOO-lardyń aýǵan stýdentterin stıpendııalyq baǵdarlamamen oqytyp jatqandaryna toqtaldy.
Kezdesý qorytyndysynda M.Áshimbaev meımanǵa yntymaqtastyqqa degen yqylasy men ázirligi úshin rızashylyǵyn bildirdi, dep habarlady Májilistiń baspasóz qyzmeti.