«О́nerkásipti damytý qory» AQ Indýstrııa jáne ınfraqurylymdyq damý mınıstrliginiń qoldaýymen shaǵyn jáne orta bıznes sýbektileri úshin óńdeý ónerkásibi jobalaryn qarjylandyrý baǵdarlamasyn iske qospaq. Baǵdarlama Qazaqstan Respýblıkasyn ındýstrııalyq-ınnovasııalyq damytýdyń 2020-2025 jyldarǵa arnalǵan tujyrymdamasy sheńberinde ShOB sýbektilerin qoljetimdi qarjylandyrýdy qamtamasyz etý arqyly ınvestısııalyq jobalardy iske asyrýǵa baǵyttalǵan.
Baǵdarlama boıynsha qarjylandyrýdyń jalpy kólemi 50 mlrd teńgeni quraıdy. Baǵdarlamanyń negizgi sharttary: qarjylandyrý merzimi – 10 jylǵa deıin; syıaqy mólsherlemesi – jyldyq 3 paıyz; qarjylandyrý somasy – 80 mln teńgeden 3 mlrd teńgege deıin; joba bastamashysynyń jeke qatysýy – joba qunynyń keminde 15 paıyzy.
«О́ńdeýshi ónerkásiptiń otandyq kásiporyndaryna lızıng jáne kredıt berý quraldary arqyly qarjylandyrý usynylady. Bul rette kredıt somasy lızıng somasynan aspaýǵa tıis. Jobalardy qaraý kezinde negizgi nazar ımportty almastyrýǵa jáne eksportqa baǵdarlanýǵa, ıaǵnı ónimderi ishki naryqtyń suranysyn jabatyn jáne eldiń eksporttyq áleýetin ósirýge múmkindik beretin kásiporyndardy qoldaýǵa baǵyttalady», delingen qor habarlamasynda.
О́ńdeýshi ónerkásip jobalaryn qarjylandyrý baǵdarlamasyn iske asyrý óńdeýshi ónerkásiptiń shaǵyn jáne orta kásiporyndarynyń negizgi quraldaryn jańartýǵa, jańa jumys oryndaryn qurýǵa jáne jumys istep turǵan jumys oryndaryn saqtaýǵa múmkindik beredi, sondaı-aq bıýdjetke salyq túsimderin qamtamasyz etedi.
Baǵdarlama boıynsha jáne qarjylandyrý alýǵa ótinimder jasaý máseleleri boıynsha tolyq aqparatty «О́nerkásipti damytý qory» AQ-dan myna telefondar arqyly alýǵa bolady: 8 (7172) 79-63-15, 8 (7172) 79-63-11.