Qazaqstan Respýblıkasy Eńbek jáne halyqty áleýmettik qorǵaý mınıstrligi 2014 jylǵy 21 mamyrda VII Astana ekonomıkalyq forýmy aıasynda «Áleýmettik áriptestik. Nátıjeli jumyspen qamtýdy jáne laıyqty eńbekti keńeıtýdi qamtamasyz etý jónindegi jaýapkershilikti bólý» atty paneldi sessııasyn ótkizedi.
Paneldi sessııa jumysyna Premer-Mınıstrdiń orynbasary G.Ábdihalyqova, Eńbek jáne halyqty áleýmettik qorǵaý mınıstri T.Dúısenova, Qazaqstan Respýblıkasy Parlamentiniń depýtattary qatysady. Sonymen birge, bul sharaǵa birqatar halyqaralyq uıymdardyń ókilderi shaqyrylǵan. Atap aıtqanda, olardyń ishinde Áleýmettik qamsyzdandyrýdyń halyqaralyq qoǵamdastyǵynyń bas hatshysy Hans-Horst Konkolevskı, Shyǵys Eýropa jáne Ortalyq Azııa elderi úshin laıyqty eńbek máseleleri boıynsha tehnıkalyq qoldaý toptarynyń jáne HEU bıýrosynyń dırektory Dımıtrına Dımıtrova, «Ortaq ıgilik úshin – jahandaný bastamasy» ÚEU negizin qalaýshy, doktor Kamran Mofıd, Reseı-Sıngapýr iskerlik forýmynyń atqarýshy dırektory Maıkl Teı, Shyǵys Eýropa men Ortalyq Azııa elderi úshin HEU bıýrosynyń jáne laıyqty eńbek máseleleri jónindegi tehnıkalyq qoldaý tobynyń halyqaralyq eńbek normalary jónindegi bas mamany Alan Pelse, Jeneva, Eýropa men Ortalyq Azııa elderi úshin HEU Bıýrosynyń bas keńesshisi Frans Aýer, Reseı Federasııasy Eńbek jáne áleýmettik qorǵaý mınıstrligi halyqty jumyspen qamtý departamentiniń dırektory Mıhaıl Kırsanov jáne basqalar bar.
Paneldi sessııa kún tártibinde myna negizgi taqyryptardy:
- nátıjeli jumyspen qamtýǵa jáne laıyqty eńbekke qol jetkizý maqsatynda áleýmettik áriptesterdiń birigýi Qazaqstannyń áleýmettik-ekonomıkalyq qarqyndy damýyn qamtamasyz etýdiń qajetti sharty;
- daǵdarys kezeńindegi jastar jumyssyzdyǵy problemalary;
- ulttyq biliktilik júıesin qalyptastyrý;
- eńbek tájirıbesi jáne kadrlardy daıarlaý salasynda bıznestiń áleýmettik jaýapkershiligin arttyrý;
- jahandaný jaǵdaıynda áleýmettik qamsyzdandyrý jáne áleýmettik saqtandyrý máselelerin qaraý josparlanǵan.
Sessııa barysynda áleýmettik áriptestik (Úkimet, qyzmetkerler men jumys berýshiler birlestikteri) sheńberinde taraptardyń jaýapkershiligine qaraı ekonomıkalyq ósýge yqpal etetin sharalardy qabyldaý jáne eńbekti qorǵaý salasyndaǵy irgeles quqyq qaǵıdattaryn saqtaý jaǵdaıynda nátıjeli jumyspen qamtýdy qamtamasyz etý jóninde birqatar usynymdar beriledi dep kútilýde.
Jylqybaı JAǴYPARULY,
«Egemen Qazaqstan».