«Qazaqstan barysy» týrnıriniń sońǵy irikteý kezeńi qyzyqty jáne tartysty ótýde. Osy kezge deıin Qyzylorda jáne Pavlodar oblysynan fınalǵa joldama alǵan balýandardy jazǵan edik. Endi, mine kezek Jambyl oblysyna da kelip qaldy. Jaqynda bul óńirden «Qazaqstan barysy» týrnıriniń 2012 jylǵy jáne «Eurasia Barysy» halyqaralyq týrnıriniń 2013 jylǵy jeńimpazy Beıbit Ystybaev pen talantty balýan Dáýlethan Jaqypovtyń qatysatyny belgili boldy. Bul týraly egemen.kz tilshisi habarlady.
«Qazaqstan Barysy» qazaq kúresin damytý qorynyń baspasóz qyzmetiniń habarlaýynsha, Beıbit bul joly da qarsylastaryn shań qaptyryp, toptan qara úzip shyqty. Jambyl oblysyndaǵy irikteý synynyń fınalynda ol talantty balýan Dáýlethan Jaqypovtan basym tústi. Jalpy, Jambyl oblysyndaǵy irikteý týrnıri eshbir balýanǵa ońaı bolǵan joq. Al byltyrǵy «Qazaqstan barysy» dodasynyń fınalyna shyqqan Aıdos Teńgebaev úshinshi oryn aldy.
-Irikteý syny rasynda ońaı bolǵan joq. Sebebi, elimizde qazaq kúresi qanat jaıyp keledi. Talantty balýandar jeterlik. Básekelestik bar. Alla qoldap, jeńiske jettim. Endi Astanada ótetin fınalǵa tyńǵylyqty daıyndyq júrgizemin, - deıdi 2012 jylǵy «Qazaqstan barysy», 2013 jylǵy «Eurasia Barysy» halyqaralyq týrnıriniń jeńimpazy.
Beıbit Ystybaevtyń boıy 193 sm, salmaǵy 135 kılo. Ol 1985 jyly Jambyl oblysy, Talas aýdany, Kóshek batyr aýylynda týǵan. Qazaq kúresinen halyqaralyq dárejedegi sport sheberi. Jattyqtyrýshysy - Eldos Dalabaı.
Al Dáýlethan Jaqypovtyń salmaǵy 82 kılo. 1992 jyly Jambyl oblysy, Talas aýdanynda týǵan. Dáýlethan dzıýdodan sport sheberi.
Osylaısha, «Saryarqa» velotreginde ótetin fınaldyq synda Jambyl oblysy Beıbit Ystybaev pen Dáýlethan Jaqypovqa úmit artady. Dáýlethan byltyr da fınaldyq aıqasqa joldama alǵan. Biraq, dzıýdodan ulttyq qurama sapynda Búkilálemdik Qazan Ýnıversıadasyna daıyndalý úshin fınaldan bas tartqan edi. Endi Jaqypov ekinshi múmkindigin qur jibermeıdi degen oıdamyz.
Dastan Kenjalın.
Derekkóz: «Qazaqstan Barysy» qazaq kúresin damytý qorynyń baspasóz qyzmeti.
Foto: «Qazaqstan Barysy» qazaq kúresin damytý qorynyń baspasóz qyzmeti.
Sýrette: soldan ońǵa qaraı Dáýlethan Jaqypov, Beıbit Ystybaev, Aıdos Teńgebaev.