Astanada Baılanys jáne aqparat agenttigi, «Zerde» ulttyq ınfokommýnıkasııalyq holdıngi» AQ pen «AKT-ny damytý qory» KQ uıymdastyrýymen ASTEX-2014 halyqaralyq kórme-konferensııasy ótti. Bul týraly egemen.kz tilshisi habarlady.
Bul kórme elimizde jyl saıyn elektrondy kommersııany, elektrondy úkimetti damytý maqsatynda ótkiziledi. Bıylǵy sharaǵa otandyq kompanııalarmen birge sheteldik iri kásiporyndardyń basshylary da qatysyp, Qazaqstannyń elektrondy kommersııany damytýda atqaryp jatqan jumystarymen keńirek tanysty.
Kórmeniń ashylý saltanatyna Baılanys jáne aqparat agenttiginiń tóraǵasy Asqar Jumaǵalıev qatysyp, sheteldiń kompanııa jetekshilerine, mamandaryna elimizde elektrondy kommersııany damytýǵa arnalǵan keshendi sharalar týraly aıtyp berdi. Onda agenttik tóraǵasy búgingi kúni elimiz BUU-nyń derekterine sáıkes, elektrondy úkimetti damytý boıynsha álemniń 190 eliniń arasynda 38-shi orynǵa ornalasqanyn, al 2010 jyly budan 16 orynǵa tómen bolǵanyn, sondyqtan tórt jyldyń ishinde osynshama orynǵa kóterilgeniniń ózi elimiz úshin úlken jetistik ekenin aıtty.
Osydan keıin «AKT-ny damytý qory» KQ bas dırektory Sanjar Kettebekov pen «Skolkovo» tehnoparkiniń bas dırektory Renat Batyrov zııatkerlik qyzmettiń nátıjelerin ınnovasııalyq damytý jáne kommersııalandyrý salasyndaǵy yntymaqtastyq týraly memorandýmǵa qol qoıdy. Sonymen birge qazaqstandyq qor men Muckerlab atty amerıkalyq kompanııasynyń arasynda aqparattyq tehnologııalar salasyndaǵy startap-kompanııalardy damytý jónindegi memorandým jasaldy.
Kórmeniń ekinshi kúni Baılanys jáne aqparat agenttiginiń mamandary sheteldik kompanııalardyń basshylary S.Franzen, Iаng Im Cho, R. Bellak, E.Rannala men R.Batyrovpen elimizde elektrondy kommersııany damytý jáne IT-klaster qurý boıynsha eki jaqty kezdesýler ótkizdi. Jalpy, «Zerde» ulttyq ınfokommýnıkasııalyq holdıngi» AQ tóraǵasynyń orynbasary Bıkesh Qurmanǵalıevanyń aıtýynsha, ASTEX-2014 halyqaralyq kórme-konferensııasyna 3 200 adam kelip, 41 spıker sóz sóıledi. Eki kúnde 9 sessııa, eki sheberlik sabaq, úsh dóńgelek ústel, startap-jobalardyń kórsetilimi, 17 eki jaqty kezdesýler ótti.
Dastan Kenjalın.
Derekkóz: Qazaqstannyń ortalyq kommýnıkasııalar qyzmeti.
Foto: Erlan Omarov.