Úkimet úıinde ótken keńes barysynda QR Premer-Mınıstri Álıhan Smaıylov «Jaıly mektep» ulttyq jobasyn iske asyrý jóninde tapsyrmalar berdi, dep habarlaıdy Egemen.kz Úkimettiń baspasóz qyzmetine silteme jasap.
Premer-Mınıstr Memleket basshysy Reformalar jónindegi Joǵary keńestiń otyrysynda «Jaıly mektep» ulttyq jobasynyń negizgi tásilderin maquldaǵanyn, onyń sheńberinde 800 myń oqýshyǵa arnalǵan jańa formattaǵy mektepter salý josparlanǵanyn eske saldy.
«Ulttyq jobany iske asyrýǵa jedel kirisýimiz kerek. Alaıda búginde óńirlerdegi 143 mekteptiń jer ýchaskelerin anyqtaý boıynsha suraqtar sheshilmegen. Bul jumysty barynsha tezdetý qajet: qazan aıynyń sońyna deıin qurylysy 2023 jyly jáne jyl sońyna deıin 2024 jylǵa josparlanǵan mektepter boıynsha máseleni sheshý kerek», dedi Álıhan Smaıylov.
Sondaı-aq ol oqý prosesin sıfrlandyrýdy tezdetý qajettigin atap ótti.
«Osyǵan baılanysty oqýlyqtardy sıfrlyq formatqa kóshirýdi jedeldetý jáne balalardy aýyr sómkelerden aryltý qajet. Ákimdiktermen birlesip, oqýshylardy planshettermen qamtamasyz etý máselesin sheshýdi qolǵa alý kerek. Atap aıtqanda, “Qazaqstan halqyna” qorymen birlesip, olardy aýyldyq mektepterdiń balalary úshin satyp alý múmkindigin pysyqtaý kerek», dep atap ótti Álıhan Smaıylov.
Keńes sońynda ol Sıfrlyq damý, ınnovasııalar jáne aeroǵarysh ónerkásibi mınıstrligine baılanys operatorlarymen birlesip, elimizdiń barlyq mektebin sapaly, jyldamdyǵy joǵary ınternetpen qamtamasyz etýdi tapsyrdy.