Ertis-Baıan óńiriniń stýdent jastary respýblıkada ótip jatqan EcoStudentKZ chellendjine belsene atsalysýda. Estafetany elimizde ekinshi bolyp Pavlodar qalasyndaǵy birneshe joǵary oqý ornynyń shákirtteri qabyldap alsa, ıgi is-sharanyń úshinshi kúninde Ekibastuz qalasynyń jastary kúrek-tyrmalaryn alyp, qoǵamdyq oryndardy tazartýǵa shyqty.
Bul kúni akademık Q.Sátbaev atyndaǵy Ekibastuz ınjenerlik-tehnıkalyq ınstıtýtynyń bir top stýdenti Ekibastuzdyń 50 jyldyǵy atyndaǵy gúlzardy retke keltirdi. Shahar turǵyndary jıi serýendeıtin baq sońǵy ýaqytta ybyrsyp ketkenin baıqaǵan jastar osy mańdy tazartýdy maqsat etken.
– Týǵan qalamyzdyń tazalyǵy – ózimizdiń qolymyzda. Keıde turmystyq qaldyqtar shashylyp jatqan kósheler men skverlerdi kórgende ózimizdiń salǵyrttyǵymyz, salaqtyǵymyz ekenin túsinemin. Áıtpese, senbilikter bolmaıdy emes, turaqty uıymdastyrylady. О́sken óńir, óngen jerimizdi syrttan kelip lastaıdy degenge onsha senińkiremeımiz. Sebebi kóshede, jolda kele jatyp, qolymyzdaǵy kámpıt qaǵazyn, bosaǵan shyryn ydysyn laqtyra salatyn jaman ádetimiz bar. Kólikte kele jatyp terezeden shylym tuqylyn, ózge de qoqysty tastap júre beretinderdi kózimiz jıi shalady. «Ádiletti Qazaqstannyń» jastar býynyna mundaı qylyqtar jat bolýy kerek, – deıdi ınstıtýttyń 2-kýrs stýdenti Tilek Smaǵulov.
Oqý ornynyń tárbıe isi jónindegi jetekshisi Álııa Májıt akademık Qanysh Sátbaevtyń esimin ıelenip otyrǵan bilim oshaǵy qaladaǵy ekologııalyq tazalyq is-sharalaryna únemi atsalysatynyn jetkizdi. Instıtýtta 1 446 jas oqysa, stýdentterdiń shamamen 30 paıyzy memlekettik tilde bilim alady. Munda syrttan kelip oqıtyndar úshin jataqhana máselesi sheshilgen.
«Jyl saıyn «Jasyl el» eńbek jasaǵyna stýdentterimizdi jumyldyryp, ekologııalyq baǵyttarda eńbektengenin qup kóremiz. Ekibastuz mańaıynda álemdegi eń iri «Bogatyr» jáne «Shyǵys» kenishteri, birneshe iri elektr stansasy, jylý-elektr ortalyǵy, kóptegen zaýyt ornalasqan. Olardyń óndiristik qaldyqtaryn aıtpaǵannyń ózinde, shahardyń ózinen kúndelikti júzdegen tonna turmystyq qaldyq shyǵarylady. Tabıǵatqa túsetin júktemeni azaıtý úshin jergilikti halyq únemi senbilik uıymdastyryp, kósheler men saıabaqtardy tazartady. Jastar da bilek sybana kirisip, mundaı tazalyq is-sharalaryna eldiń aldy bolyp atsalysady. Qalamyzdyń tazalyǵy úshin osyndaı ıgilikti isterge muryndyq bolyp júrgen stýdentterimizdiń belsendiligi qýantady», deıdi Álııa Amanjolqyzy.
Tazalyq – qashanda kún tártibinen túspegen másele. О́z aýlańdy, qorshaǵan ortańdy taza ustaý mádenıeti adamǵa jastaıynan sińirilmese, óse kele qulaǵyna quıý qıyn. Osy sebepten de jastar qaýymyn ekologııalyq is-sharalarǵa jıi qatysýǵa yntalandyrý durys qadam.
Osy oraıda myna bir ańyz esimizge tústi: Ertede bir danyshpan ómir súripti. Álgi aqyl ıesi jer betindegi qupııanyń bárin bilgen desedi. El-jurttyń arasynda aqyl-oıymen ozyp shyqqandardy kóre almaıtyndar qaı kezde de tabylady. Qyzǵanysh oty sharpyǵan bir adam únemi ony súrindirgisi keledi eken. Eldiń kózinshe onyń da birdeńeni bilmeıtinin dáleldegisi kelipti. Birde adamdar jınalyp otyrǵan jerde álgi pende alaqanyna bir kóbelekti qysyp ustap turyp: «Aıtshy, danyshpanym, meniń qolymdaǵy qandaı kóbelek, tiri me, óli me?», dep suraıdy. О́zi ishinen: «Eger tiri dese, myjyp jiberemin, al eger óli dese, onda qoıa beremin» dep oılap turady. Sonda danyshpan sál oılanyp turyp: «Bári seniń qolyńda», degen eken.
Qazir jer betindegi adamzat balasynyń ómir súrýine qolaıly jaǵdaıdyń barlyǵy sanaly tirlik ıesiniń óz qolyńda. Árdaıym taza aýamen tynystaǵyń kelse, kórikti, jınaqy kóshelermen serýendegiń kelse, tazalyqty óz aýlańnan basta. Eldi mekenderdegi kópshilik oryndar, saıabaqtar men gúlzarlar, avtojoldar boıy únemi tazalyqty qajet etedi. Al tabıǵat tazalyǵy – adam densaýlyǵynyń kepili.
Pavlodar oblysy,
Ekibastuz qalasy