Ekibastuz qalasynda iri metallýrgııalyq klasterdiń negizi salyndy. Bolashaq óndiris aýmaǵynda alǵashqy zaýyttyń irgetasy qalanyp, qurylysqa resmı túrde ruqsat berildi. Keleshekte onda shyǵarylatyn daıyn ónimder alys jáne jaqyn shetelderge eksporttalmaq. Kásiporyn aýmaǵynda shamamen 3 myń jumys orny qurylady.
Eksporttyq baǵyttaǵy kásiporyn Memleket basshysy Qasym-Jomart Toqaevtyń Ońtústik Koreıaǵa jasaǵan sapary kezinde sóz bolǵan iri metallýrgııalyq klasterdiń alǵashqy jobasy retinde júzege asyrylyp jatyr.
Bul jerde ferroqorytpalar men bolat óndiretin kásiporyndar, metaldy ekinshi qaıtara óńdeıtin fabrıkalar turǵyzylady. «Mineral Product International» JShS-nyń ınvestısııalyq jobasy tolyq iske assa, jylyna 160 myń tonna ferroqorytpa shyǵarý qabiletine ıe. Ferroqorytpalar óndiretin kásiporynnyń ereksheligi, óndiristen shyǵatyn zııandy qaldyqtardy 99,9%-ǵa deıin zalalsyzdandyrady. Daıyn ónim Eýrazııalyq odaqqa, Azııa elderi men AQSh-tyń metallýrgııalyq naryǵyna jóneltiledi. Tartylǵan ınvestısııalardyń jalpy somasy 360 mln dollardy qurap otyr.
– Metallýrgııalyq klaster quramyna metaldy ekinshi qaıtara óńdeý fabrıkasy, ferroqorytpalar men bolat óndirý kásiporyndary kiredi. Bul jobalardy júzege asyrý arqyly 2025 jylǵa deıin oblystyń óńdeýshi ónerkásip kólemin 57 paıyzǵa deıin arttyrýǵa jaǵdaı jasalady. Jergilikti turǵyndar úshin 3 myńǵa jýyq jańa jumys ornyn ashýǵa múmkindik týady, – dep atap ótti bolashaq kásiporynnyń qazyǵyn qaǵý rásiminde Pavlodar oblysynyń ákimi Ábilqaıyr Sqaqov.
Jyl saıyn ishki naryqty 3 mln tonnadan astam bolat ónimimen qamtý arqyly ımport kólemi 70 paıyzǵa deıin azaıtylmaq.
Al kompanııa aksıoneri Sergeı Kannyń sózine qaraǵanda, Pavlodar oblysynda metallýrgııa salasyn damytýǵa barlyq múmkindik bar. Memleket preferensııalar jáne qajetti ınfraqurylymdy tartýǵa múmkindik berý arqyly ınvestorlarǵa barynsha qolaıly jaǵdaı jasaýda.
«Pavlodar oblysyn tańdaý kezinde mundaǵy shıkizattyq baza, joǵary bilikti mamandar men energetıkalyq múmkindikterge erekshe nazar aýdardyq», deıdi ol.
Aıta ketelik, búginde oblystaǵy ónerkásiptik ónim kólemi 1,4 trln teńgege jetken, bul respýblıka boıynsha ekinshi kórsetkish. Shıkizattyq emes eksport 1,4 esege ósip, óńir bul boıynsha da el aýmaǵynda taǵy ekinshi orynǵa shyqqan. 2025 jylǵa deıin jalpy somasy 2 trln teńgege 143 iri ınvestjobany júzege asyrý kózdelýde. Osynyń nátıjesinde, jańadan on myń jumys ornyn qurý josparlanyp otyr.
Pavlodar oblysy