Atyraýda Ánuran avtory, memlekettik syılyqtyń laýreaty, kórnekti aqyn Jumeken Nájimedenov atyndaǵy «Elim meniń!» kórkemsóz oqý sheberleriniń respýblıkalyq baıqaýy ótti. Oǵan elimizdiń ár óńirinen 18-35 jas aralyǵyndaǵy 13 úmitker qatysty.
Baıqaýǵa qatysýshylar Jumeken Nájimedenovtiń poezııalyq jáne prozalyq shyǵarmalarynan úzindi oqydy. Mátindi jatqa oqýǵa 5 mınýt ýaqyt berildi. Daıyn fonogrammany paıdalanýǵa tyıym salyndy.
– Qazaq poezııasynda ózindik órnegin qaldyrǵan aqyn osy óńirdegi Qoshalaq topyraǵynda dúnıege kelgen. Jastyq shaǵyn Alataýdyń baýraıynda ótkizgenimen, týǵan jerge saǵynyshyn jyryna arqaý etti. Onyń óleńderinen taǵylym men tárbıeniń, adaldyq pen otansúıgishtiktiń tereń mánin ańǵarýǵa bolady. Sol sebepten onyń shyǵarmalaryn tereń zerttep, keıingi urpaqqa nasıhattaý – bizdiń boryshymyz, – deıdi oblys ákiminiń orynbasary Jasulan Bısembıev.
Qazaqstan Jazýshylar odaǵy basqarma tóraǵasynyń orynbasary Mereke Qulkenov jetekshilik etken qazylar alqasy qatysýshylardyń oqý sheberligi, daýys máneri, til tazalyǵy, kórkem mátindi tańdaý jáne sahnada ózin-ózi ustaýy talǵamyn saralady. Baıqaý qorytyndysymen bas júldege almatylyq Arshyn Nurbaqyt laıyq dep tanyldy. Jetisý oblysynyń ókili Arshyn Aıdynbekuly birinshi oryndy ıelendi. Al túrkistandyq Erjan Joldasov ekinshi, Batys Qazaqstan oblysynan qatysqan Bekzat Vasıhan úshinshi júldege ıe boldy.
Atyraý oblysy