Álbette, Qazaqstanda tranzıttik áleýet máselesi burynnan kún tártibinde bar, biraq sońǵy birneshe aıda memleket osy baǵyttaǵy áleýetke aıryqsha kóńil aýdardy. Buryn bar marshrýtpen bazar bolyp kelsek, endi baǵyttardy ártaraptandyrýdyń mańyzdy ekenin túsindik. Osy oraıda biz úshin temirjol ınfraqurylymyn damyta túsý mańyzdy.
Indýstrııa jáne ınfraqurylymdyq damý vıse-mınıstri Almaz Ydyrysovtyń aıtýynsha, elimizde logıstıkany damytý baǵytynda birqatar ınfraqurylymdyq jobalar daıyndalyp jatyr.
«Bizdiń iri jobamyz – Dostyq – Moıynty. Biz oǵan úlken mán berip otyrmyz. Sondaı-aq Almaty qalasyn aınalyp ótetin temirjol jelisi, Darbaza – Maqtaaral temirjol jelisi, Aqtaý teńiz porty terrıtorııasynda transporttyq-logıstıkalyq habty qurý jumystary jáne Aqtaý portynda termınal qýattylyǵyn keńeıtý jumystary atqarylýda. Munyń bári logıstıkalyq tasymaldy damytýǵa úlken serpin syılaıdy», dedi Almaz Ydyrysov taıaýda ótken New Silk Way forýmynda.
Vedomstvo ókiliniń sózine qaraǵanda, konteınerlik hab qurýǵa 10,4 mlrd teńge bólý qarastyrylyp otyr. Bul jumys «Qýatty óńirler – el damýynyń draıveri» ulttyq jobasy aıasynda júzege aspaq. Eger joba sátti júzege assa 2025 jylǵa qaraı konteıner tasymaly aǵyny 40 myńnan 133 myń fýttyq ekvıvalentke deıin artpaq.
Onyń aıtýynsha, qazir memleket erekshe nazar aýdaryp otyrǵan baǵyt – halyqaralyq Transkaspıı marshrýty. Atalǵan marshrýt Qytaı men Qazaqstandy, Kaspıı teńizi akvatorııasyn, Ázerbaıjan men Grýzııany kesip ótip, ári qaraı Túrkııa men Eýropa elderine baǵyt alady. Vıse-mınıstr aıtyp ótken Dostyq – Moıynty, Darbaza – Maqtaaral temirjol jelileriniń de osy Transkaspıı marshrýtyna qatysy bar ekenin aıta keteıik. Sonymen birge Qytaımen shekarada «Baqty» ótkizý beketi de jumysyn bastamaq.
PTC Holding JShS basqarma tóraǵasy Tımýr Qarabaevtyń aıtýynsha, konteınerlik jáne mýltımodaldyq tasymaldy damytý eldegi transport salasynyń damýynda basty trendke aınalmaq.
«Qazir búkil álemde konteınerlik tasymal eń tanymal, eń senimdi jetkizý túrine aınaldy. Halyqaralyq naryqtaǵy bul tasymaldyń úlesi 90 paıyzǵa jetip otyr. Qazaqstandaǵy konteınerlik tasymal kólemi jyl saıyn ósip jatyr. Máselen, byltyr bul kórsetkish 22 paıyzǵa artty. Alaıda sala damýyn tejep turǵan faktorlar bar. Bul – tarıf máselesi. Qazaqstanda konteınermen bir tonna júk tasymaldaý quny ózge elder baǵasynan 2,5-3 ese joǵary. Jaqyn kórshilerimizdiń tájirıbesi kórsetkendeı, konteınerlik tasymal tıimdi bolatyn tarıfterge negizdelgen kózqaras júk tasymaldaý kólemin kúrt arttyrýǵa múmkindik berdi. Al búginde biz ındýstrııalandyrý jolymen júrip, qazaqstandyq óndirýshiler men eksporttaýshylardy qoldaý týraly aıtatyn bolsaq, onda biz transport salasynyń ókilderi retinde taýarlardy jetkizýdiń barynsha kóp nusqalaryn usyný arqyly olarǵa kóbirek múmkindikter berýimiz kerek», deıdi T.Qarabaev.
Indýstrııa jáne ınfraqurylymdyq damý mınıstri Qaıyrbek О́skenbaevtyń aıtýynsha, Aqtaýda konteınerlik hab qurý jáne Transkaspıı dálizin damytý sııaqty iri jobalar PSA, Abu Dhabi Ports, Adani Group, CMA CGM, Maersk syndy áleýetti ınvestormen birlesken kásiporyn formatynda iske asyrylmaq.
«Sondaı-aq «Qazaqstan temir joly» ulttyq kompanııasyn tolyq kólik-logıstıkalyq korporasııaǵa aınaldyrý modelin qalyptastyrý boıynsha jumys júrgizilýde. QTJ-nyń transformasııasyn álemdik kólik-logıstıkalyq kompanııalarmen (PSA, DBShenker, CoscoShipping, DPWorld jáne t.b.) kooperasııa, kólik dálizderin sıfrlandyrý jáne syrtqy termınaldyq jelilerdi qurý sııaqty baǵyttar boıynsha júzege asyrý usynylady», dedi mınıstr.