Búgin Premer-Mınıstr Álıhan Smaıylov elimizdiń gaz salasyn keshendi damytý máseleleri boıynsha keńes ótkizdi. Oǵan Premer-Mınıstrdiń birinshi orynbasary Roman Sklıar, birinshi energetıka vıse-mınıstri Murat Júrebekov jáne «QazaqGaz» UK» AQ basqarma tóraǵasy Sanjar Jarkeshov qatysty, dep habarlaıdy Egemen.kz primeminister.kz-ke silteme jasap.
Keńeste 2030 jylǵa deıin gazben qamtamasyz etý boljamy, sondaı-aq jańa gaz ken oryndaryn ıgerýdi yntalandyrý jáne taýarlyq gaz óndirisin ulǵaıtý sharalary qaraldy.
Osylaısha, Memleket basshysynyń tapsyrmasy boıynsha birqatar retteýshilik jáne fıskaldyq artyqshylyqty kózdeıtin jer qoınaýyn paıdalanýǵa arnalǵan jaqsartylǵan modeldik kelisimshart engiziledi. Bul gaz salasyndaǵy qoldanystaǵy jáne perspektıvaly jobalardy iske asyrýdy jandandyrýǵa, sondaı-aq taýarlyq gazdyń resýrstyq bazasyn keminde 7,7 mlrd m3 ulǵaıtýǵa múmkindik beredi.
Sonymen qatar Úkimet gaz satyp alýdyń yntalandyrýshy baǵalaryn qoldaný máselesin pysyqtaýda, bul ony óndirý kólemin 1 mlrd-tan 3 mlrd m3 deıin qosymsha arttyrýdy qamtamasyz etedi.
Premer-Mınıstr Energetıka mınıstrligi men «QazaqGaz» UK» AQ-nyń eldiń resýrstyq bazasyn damytý jónindegi tásilderin maquldap, osy baǵyttaǵy keshendi jumysty kúsheıtýdi tapsyrdy.
Sondaı-aq eldiń soltústik jáne shyǵys aımaqtaryn gazdandyrý máseleleri talqylandy. Álıhan Smaıylov yqtımal tehnıkalyq nusqalardy egjeı-tegjeıli pysyqtaýdy jáne tıisti jol kartasyn daıyndaýdy tapsyrdy.