Jelide Aqtaý mańyndaǵy Kaspııge las qońyr sýdyń tógilip jatqany beınelengen vıdeo tarady. Osyǵan baılanysty Ekologııa departamentiniń mamandary Kaspııdegi buzýshylyqtardy anyqtady, dep habarlaıdy Egemen.kz.
Mańǵystaý oblysynyń Ekologııa departamenti oryn alǵan jaǵdaıǵa túsinikteme berdi.
Departament basshysy Rýslan Tókenov «Kaspıı sý tushylandyrý zaýyty» JShS jáne «Orbıta» sport kesheni bul arnaǵa sý aǵyzý jumystaryn júrgizip jatqanyn atap ótti.
Mańǵystaý oblysy boıynsha ekologııa departamentiniń mamandary oqıǵa ornyna jedel baryp, kanal boıyndaǵy lastaný aımaǵyn tekserdi. Tekserý barysynda №1 JEO shyǵarý qubyrynyń Kaspıı teńizine aǵyzý kózinen, «MAEK-Qazatomónerkásip» JShS kanalyna aǵyzý kózinen jáne «Kaspıı tushylandyrý zaýyty» JShS aǵyzý qubyrynyń kózinen sý synamalary alyndy.
«Zertteý nátıjeleri boıynsha «Kaspıı tushylandyrý zaýyty» JShS tógý qubyrynyń kózinen jáne №1 JEO shyǵarý qubyrynyń kózinen temir men fosfat, mys quramynyń asyp ketýi anyqtaldy. Anyqtalǵan faktiler boıynsha zańnamada belgilengen tártippen qajetti sharalar qabyldanyp, atqarylǵan jumystyń nátıjeleri týraly qosymsha habarlanady», dep túsindirdi Rýslan Tókenov.