Qostanaıda «Mereıli otbasy» ulttyq baıqaýynyń oblystyq kezeńi óz máresine jetti. Jastar saraıynda ótken saltanatty jıynda kórgendi urpaq tárbıelep, kópke ónege bolyp otyrǵan úlgili otbasylardyń oshaq qasyndaǵy jarasymdy tirshiligi dáriptelip, dástúrli baıqaýdyń jeńimpazdary marapattaldy.
Bıyl segizinshi márte qorytyndylanyp otyrǵan taǵylymdy shara oblys ákimdiginiń qoǵamdyq damý basqarmasynyń uıymdastyrýymen ótti.
Uıymdastyrýshylardyń aıtýynsha, «Mereıli otbasy» ulttyq baıqaýyn ótkizýdegi basty maqsat – qazirgi qoǵamdaǵy adamgershilik qundylyqtaryn jańǵyrtý, sondaı-aq otbasy mártebesin kóterip, ata-analardyń bala tárbıesindegi jaýapkershiliginiń artýyna yqpal etý. Osy segiz jyldyń ishinde baıqaýǵa 800-den astam otbasy qatysty. Byltyr 126 otbasy baq synaǵan. Osy jyly oblys boıynsha 108 otbasy qatysyp otyr.
Bul joly aýyldyq, aýdandyq irikteýden 20 otbasy ozyp shyqty. Oblystyq kezeńge ótkenderge aqshalaı júlde taǵaıyndalyp, úlgi-ónegesimen erekshelengen nemese ónerpaz otbasylarǵa, sondaı-aq áýlet bolyp eńbekke jumylyp, kásippen aınalysyp jatqan otbasylarǵa arnaıy syılyq tabys etildi.
Saltanatty jıynda Qostanaı oblysy qoǵamdyq damý basqarmasy basshysynyń orynbasary Abylaıhan Kákenov sóz sóılep, jeńimpazdardy quttyqtady.
– Qazaq úshin qashanda kıeli sanalatyn bir shańyraqtyń astynda berekeli ómir súrýdiń mán-mańyzyn nasıhattaýda ulttyq konkýrstyń alar orny aıryqsha, taǵylymdy is-shara dep aıtar edim. Osy saıysta baq synaǵandardyń barlyǵy da mereıli otbasy, tálim-tárbıeniń qaınar kózi, – dedi Abylaıhan Kákenov.
Bıylǵy baıqaýǵa qatysqandardyń qaı-qaısysy da jeńiske laıyqty. Degenmen komıssııa músheleriniń sheshimimen Qarasý aýdanynda turatyn Sháripovter áýleti jeńimpaz atandy. Bolat Satybaldyuly men Marına Vasılevnanyń otasqanyna bıyl 33 jyl bolypty. Ekeýi de qarapaıym eńbek adamdary. Balalary Dámir men Dıana ár túrli salada eńbek etip, tabysqa jetip júr.
– Áýletimizde bolǵan birqatar qýanyshty oqıǵalardy sebep etip, bıyl konkýrsqa ótinish berdim. Týystarymyz, áriptesterimiz, dostarymyz qoldaý kórsetti. Dál qazirgi kóńil kúıimdi sózben aıtyp jetkize almaspyn. Otbasym úshin qýanyp turmyn, – dedi Bolat Sháripov.
Osy synda úzdikterdiń qatarynan kóringen jıyrma otbasyna oblys ákimi Arhımed Muhambetovtiń qoly qoıylǵan dıplomdar men aqshalaı syılyqtar tabys etildi. Al Sháripovter otbasy endi respýblıkalyq kezeńde baq synaıtyn bolady.
Qostanaı oblysy