Tájikstan Respýblıkasynyń Prezıdenti Emomalı Rahmondy elorda áýejaıynda QR Premer-Mınıstri Álıhan Smaıylov qarsy aldy, dep habarlaıdy Egemen.kz Úkimettiń baspasóz qyzmetine silteme jasap.
Tájikstan Prezıdenti Azııadaǵy ózara is-qımyl jáne senim sharalary jónindegi VI sammıtke, TMD memleket basshylary keńesiniń otyrysyna jáne «Ortalyq Azııa – Reseı» sammıtine qatysady. 12-13 qazanda Astanada Azııadaǵy ózara is-qımyl jáne senim sharalary jónindegi keńestiń VI sammıti ótedi, oǵan barlyǵy 50-ge jýyq delegasııa qatysady.
14 qazanda elordada TMD memleket basshylary keńesiniń otyrysy ótedi, onyń aıasynda uıym qyzmetiniń negizgi máseleleri talqylanady. Otyrysqa Ázerbaıjan, Armenııa, Belarýs, Qazaqstan, Qyrǵyzstan, Reseı, Túrikmenstan, Tájikstan jáne О́zbekstan basshylary qatysady.
Sonymen qatar 14 qazanda Astanada «Ortalyq Azııa – Reseı» sammıti ótedi. Onda saýda, mádenıet, qaýipsizdik jáne t.b. salalardaǵy óńirlik yntymaqtastyq máseleleri talqylanady.