Qazaqstan Respýblıkasynyń Ǵylym jáne joǵary bilim mınıstrligi Til saıasaty komıteti Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵy uıymdastyrǵan medısına salasyndaǵy ózge ult ókilderi arasyndaǵy «Memlekettik til – táýelsizdik sımvoly» atty respýblıkalyq baıqaýynyń jeńimpazdary Qaraǵandy jerinde anyqtaldy, dep habarlaıdy Egemen.kz.
Qazaq tiliniń qoldanys aıasyn keńeıtý maqsatynda uıymdastyrylǵan bul baıqaýǵa elimizdiń óńirleri men Astana, Almaty, Shymkent qalalarynan iriktelgen 12 úmitker qatysty.
Sharany ashyp sóz sóılegen akademık Evneı Bóketov atyndaǵy Qaraǵandy ýnıversıtetiniń áleýmettik-mádenı damý jónindegi prorektory Meıirjan Syzdyqov: «Álemdegi jahandaný prosesi ár halyqtyń aldyna ózderiniń ulttyq rýhanı-mádenı qundylyqtaryn jandandyrý mindetin qoıyp otyr. Osy rette bizder úshin qazaq tiliniń áleýmettik mártebesin joǵarylatý, memlekettik tildi rýhanı-mádenı qundylyq retinde dáripteý asa mańyzdy. Bıylǵy baıqaý medısına salasynda júrgen ózge ult ókilderiniń arasynda ótip otyr. Onyń ózindik ereksheligi bar. Birinshiden, densaýlyq salasy – halyq jıi tutynatyn sala. Nelson Mandela aıtqandaı, eger adamdarmen uǵynysa alatyn tilde sóılesseńiz, sózińiz onyń aqyl-oıyna ǵana arnalǵan bolyp shyǵady. Al onyń ana tilinde qarym-qatynas ustasańyz, birden júregine jol taptym deniz degenindeı. Ekinshiden, qazaq tilin turmystyq deńgeıde meńgerý óz aldyna; onyń salt-dástúrin, ádet-ǵurpyn, mádenıeti men ádebıetin, ónerin tanysańyz, siz eldiń kóz aldynda jandúnıesi baı adamǵa aınalyp, zııaly qaýym ókili qatarynan tabylasyz, qarapaıym eńbek adamdarynyń qurmetine bólenesiz», dedi.
Respýblıkalyq baıqaý tórt kezeńnen turdy. Alǵashqysynda qatysýshylar óz ónerlerin kórsetse, ekinshi bóliginde qazaqtyń maqal-mátelderi boıynsha bilim synasty. Budan keıin ekrandaǵy uıashyqtarda kórsetilgen taqyryp tóńireginde oı órbitti. Eń sońynda bir mınýt ishinde jıyrma suraqqa jedel jaýap berý boıynsha saıysty.
Qazylar alqasynyń qyzý talqylaýynan keıin báıgeniń bas júldesi astanalyq Rozalına Mahmýdovanyń qanjyǵasyna baılanyp, 300 myń teńge syılyqqa ıe boldy. Birinshi orynǵa shymkenttik Sardorbek Rýstamjanov laıyqty dep tanyldy. Oǵan 200 myń teńgeniń sertıfıkaty tabystaldy. Ekinshi oryndy Túrkistan oblysynan Fatıma Mamedova jeńip aldy. Ol 150 myń teńgege ıe boldy. Úshinshi oryndy soltústikqazaqstandyq Saıdalı Iýsýpov men Almaty oblysynan Rýfat Saıdalımov bólisti. Olardyń árqaısysyna 100 myń teńge syılyq beriledi. Bulardan basqa tórt úmitker árqaısysy 15 myń teńgeden yntalandyrý syılyǵyna ıe bolsa, qalǵan qatysýshylar arnaýly dıplom, alǵyshatpen marapattaldy. Qazylar alqasynyń quramyna belgili ǵalymdar, til salasynyń bilikti mamandary men Qazaqstan halqy Assambleıasynyń músheleri endi.