Qazaqstannan halyqaralyq baǵytqa jóneltiletin tasymal kólemi bir jyl ishinde 3 esege artqan. ATI.SU statıstıkasy boıynsha, avtomobıl júk tasymaly syrtqy baǵytta da, Qazaqstannyń óz ishinde de kóbeıdi.
Reseı men TMD-daǵy kóliktik logıstıkaǵa arnalǵan servısterdiń iri ekojúıesi – ATI.SU baǵalaýy boıynsha Qazaqstan tranzıttik áleýetin tabysty damytýda jáne jahandyq logıstıkalyq shekteýler jaǵdaıynda Ortalyq Azııadaǵy transporttyq hab rólin sátti atqaryp jatyr.
«2022 jyldyń úshinshi toqsanynyń qorytyndysy boıynsha el terrıtorııasy boıynsha júkterdi jetkizip berýge qatysty ótinim sany ekinshi toqsanmen salystyrǵanda 20 paıyzǵa, al jyldyq mánde 2 esege ósti. Osylaısha, suranystyń ósýi Qazaqstanda Reseı jáne Belarýs kompanııalarynyń relokasııasyna áser etip, sáıkesinshe básekeniń artýyna keri yqpal etetin naryqtaǵy jaǵymsyz faktorlardyń kózin joıdy. Qazir júk tasymalyna degen suranys usynystyń aldyn orap tur. Bul júk ıelerin ashyq sıfrlyq platformalarda oryndaýshylardy izdeýge jáne senimdi tasymaldaýshylar pýlyn keńeıtýge ıtermeleıdi», delingen habarlamada.
Sondaı-aq Qazaqstannan basqa elderge tasymal jasaý boıynsha ótinimder sany da ekinshi toqsanmen salystyrǵanda 29 paıyzǵa, al jyldyq mánde úsh esege artqan. Reseı, О́zbekstan, Qyrǵyzstan, Ázerbaıjan elderine jáne birqatar alys baǵyttarǵa júk tasymaly kóbeıgen.
«Reseılik jáne belarýstyq tasymaldaýshylardyń Eýropada jumys isteý múmkindiginiń shektelýi de eksporttyq tasymaldyń ósýine áser etip tur. Nátıjesinde, keıbir qazaqstandyq tapsyrys berýshiler osy elderdiń turaqty seriktesterimen jumys isteýdiń ornyna bırjada ótinimder ornalastyrady jáne jergilikti tasymaldaýshylar arasynda jańa seriktester tabady», deıdi ATI.SU júk tasymaly bırjasy qazaqstandyq ókildiginiń dırektory Renat Zobov.
Importtyq tasymaldaýǵa qatysty ótinim ekinshi toqsanmen salystyrǵanda 4 paıyzǵa, jyldyq mánde 6 paıyzǵa ǵana ósken.