Astanadaǵy Qanysh Sátbaev eskertkishiniń aınalasyna «Ulylar sózi» atty granıt syntastar kompozısııasy qoıyldy. Danalar sózi dalanyń balbaldaryndaı Qanysh Sátbaevtyń eskertkishin aınaldyra qaýmalap tur. Ǵulama ǵalymnyń ózi Sátbaev kóshesin betke alyp, álgi sózder oǵan jol ashyp turǵandaı áserge qaldyrady. Al onyń eskertkishine jazylǵan «Meniń halqym menen de bıik» degen sózi Qazaq pen Qanysh esimin máńgi ólmes bolashaqqa alyp bara jatqandaı.
«Halyqaralyq Sátbaev qorynyń» qamqorshylar keńesiniń uıytqy bolýymen ótken is-sharaǵa qoǵam qaıratkerleri men zııaly qaýym ókilderi, Parlament Senatynyń depýtattary, ǵulama ǵalymnyń urpaqtary, Astana qalalyq máslıhaty men qalalyq ákimdik ókilderi qatysty. Alǵashqy sózdi Parlament Senatynyń depýtaty, «Halyqaralyq Sátbaev qorynyń» qamqorshylar keńesiniń tóraǵasy Altynbek Nuhuly sóıledi:
«Qanysh Imantaıulynyń eskertkishi byltyr ashylǵanyn bilesizder. Pandemııaǵa baılanysty ashylý saltanatyn keń kólemde ótkizýge shekteý boldy. Sol kezde tolyǵynan ashylmaǵan eskertkishtiń tujyrymdamasyn tolyqqandy keshen etý úshin mańaıyn maǵynaly sózder jazylǵan granıt tastarmen kómkerý kózdeldi. Búgin qoıylǵan 4 tastyń birinshisine Qanysh Imantaıulynyń óz sózi, zańǵar ǵulamalar Muhtar Áýezov, Álkeı Marǵulan, Shapyq Shókınniń sózderi, memleket jáne qoǵam qaıratkerleri Nurtas Ońdasynov, akademıkter Evneı Bóketov, О́mirbek Joldasbekov sózderi, tórtinshisine aqyn-jazýshylar Kákimbek Salyqov, Medeý Sárseke, Nesipbek Aıtulynyń jalyndy sózderi men óleń mátinderi jazylǵan», dedi Altynbek Nuhuly.
12 sáýir – Qanysh Sátbaevtyń týǵan kúni kúntizbege Ǵylym kúni retinde engizilgeni barshaǵa belgili shyǵar. Ony bekittirýge negiz bolǵan Baqytjan Jumaǵulov ta Qanysh Imantaıulynyń Qazaqstan ǵylymyn qalyptastyrýdaǵy eren eńbegine toqtalyp ótti. Sonymen qatar Ǵylym jáne joǵary bilim mınıstriniń quttyqtaý hatyn onyń orynbasary Q.Erǵalıev oqyp berdi. Senator Altynbek Nuhuly keleshekte eskertkish aldynan sýburqaq ashylatynyn málimdedi. Sonymen qatar Qanysh Sátbaev eskertkishiniń avtorlary Asqar Nartov pen Samatbek Bókebaı esimderin qurmetpen atady.
Muhtar Áýezovtiń munda jazylǵan sózinde: «Qanyshtyń bir úlken ereksheligi – ol hımıkpen de, bıologpen de, fızıkpen de jáne tarıhshymen de, fılologpen de ózderiniń ǵylymı tilderinde sóılese biledi. Jan-jaqty ǵalym, tynymsyz izdengish Qanysh ǵalymdar úshin naǵyz ustaz, barlyq jaǵynan úlgi-ónege», depti. Osyǵan oraılas Halyq qaharmany, akademık Shapyq Shókınniń myna bir sózi keltirilgen: «Sıntezge beıim oıshyldar óte sırek týady. Sıntetıkalyq ıntellekt ıesi atanǵan ǵalymdar keńinen tanymal: Leonardo da Vınchı, Eınshteın, Andreı Saharov... olar qandaı iske kirisse de, jan-jaqty dana boldy. Osyndaı aqyl júıesindegi erekshe oıshyldardyń qataryna men batyl túrde Qanysh Sátbaevty qosamyn», degenin urpaq jattap ósýi úshin qoıylǵan syntastardyń mán-mańyzy aıtpasa da túsinikti dep bilemiz.
L.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov pen Memlekettik syılyqtyń laýreaty, aqyn Nesipbek Aıtuly da júrekjardy lebizderin ortaǵa saldy. Munda Qanyshqa arnap poema jazǵan aqynnyń shýmaqtary jazylǵan. Sózimizdi sondaǵy shýmaqpen qorytamyz:
«Bolmysy sútten taza,
nurdan jaryq,
Baqytty Sátbaevty týǵan halyq.
Atasy sol dep qazaq ǵylymynyń
Aıtady surasań da kimnen baryp».