Shymkent qalasynyń ákimi M.Áıtenov, «SAÝTS-Oıl» kompanııasynyń prezıdenti S.Seıitjanov, China Machinery Engeneering Corporation kompanııasynyń dırektory Hý Djanhý shahardaǵy «Bozaryq-2» shaǵyn aýdanynan ashylatyn 800 oryndyq ýnıversıtettik kópbeıindi aýrýhana men bir aýysymda 700 adam qabyldaıtyn klınıkalyq-dıagnostıkalyq ortalyqtyń qurylysynyń bastalýyna resmı túrde pármen berdi. Saltanatty is-sharaǵa sondaı-aq qalalyq densaýlyq saqtaý men kásipkerlik jáne ındýstrıaldy-ınnovasııalyq damý basqarmasynyń basshylary, ýnıversıtet rektorlary jáne qoǵam belsendileri qatysty.
Joba arnaıy memlekettik baǵdarlamasy aıasynda Shymkent qalasynyń densaýlyq saqtaý ınfraqurylymyn damytýdyń 2026 jylǵa deıingi óńirlik perspektıvalyq josparyna sáıkes iske asyrylýda.
Qos nysan da jeke ınvestor – «Ońtústik» qarjy saýda-ónerkásiptik korporasııasy» holdıngi esebinen salynady. Osynaý jobany iske asyrýdyń nátıjesinde, qalada jańadan 2,5 myńnan astam jumys orny paıda bolady.
Atalǵan is-sharada alǵashqy bolyp sóz alǵan shahar basshysy Qazaqstan Respýblıkasynyń Prezıdenti Qasym-Jomart Toqaev óziniń Qazaqstan halqyna arnaǵan Joldaýynda densaýlyq salasyn damytýǵa kóp basymdyq bergenin atap ótti. «Jalpy, el ekonomıkasy men halyqtyń densaýlyǵy arasynda tikeleı baılanys bar. Sebebi deni saý ulttyń ekonomıkasy da myqty bolady. Ekonomıkalyq damýdyń álemdik tájirıbesi kórsetip otyrǵandaı, deni saý ult tıimdi ekonomıkany qalyptastyrady. Ult saýlyǵy men óndiristik resýrs kez kelgen qoǵamdyq júıeniń basty baılyǵy bolyp sanalady. Osy oraıda qalamyzda jańa zamanaýı aýrýhananyń salynýy halyqqa medısınalyq kómektiń sapasyn arttyrýǵa septigin tıgizedi. Sonymen birge tósektik oryn tapshylyǵy qysqaryp, megapolıs turǵyndaryna joǵary tehnologııalyq medısınalyq qyzmetter alýǵa zor múmkindik týady», deı kele qala ákimi zamanaýı emdeý, dıagnostıkalyq mekemesiniń qurylysyna muryndyq bolǵan «Ońtústik» qarjy saýda-ónerkásiptik korporasııasy» holdınginiń, Ońtústik Qazaqstan medısına akademııasynyń ujymyna jáne S.Seıitjanulyna belsendi azamattyq ustanymy men shahardyń densaýlyq saqtaý salasyn damytýǵa qosqan erekshe úlesi úshin rızashylyǵyn bildirdi.
О́z kezeginde «SAÝTS-Oıl» kompanııasynyń prezıdenti S.Seıitjanov megapolısti kórkeıtý, damytý jolynda aıanbaı eńbek etýge daıyn ekenin jetkizdi.
«Shymshahardyń gúldenip, túrlenýine árbirimiz úles qosqanymyz jón. О́ıtkeni Shymkent – bizdiń ortaq úıimiz. Al ult saýlyǵy Qazaqstan bolashaǵy úshin óte mańyzdy. Deni saý ult qana Otanyn órkendete alady», dedi ol.
Qala ákimdigi tarapynan da bul bastamaǵa jan-jaqty qoldaý kórsetilip otyr. Qazirgi tańda «Bozaryq-2» shaǵyn aýdanynan aýrýhana qurylysyna jalpy aýdany 150 gektar jer bólinip, atalǵan jer ýchaskesine qajetti ınfraqurylym júıeleri – elektr jaryǵy, tabıǵı gaz, sý, káriz júıesi jáne baılanys jelisi tartyldy. Jaýapty mamandardyń aıtýynsha, aldaǵy ýaqytta qurylys jumystary barysynda qos nysan jol jáne oǵan qajetti tıisti ınfraqurylymmen tolyq qamtamasyz etiledi.
ShYMKENT