Jastar resýrstyq ortalyǵynyń uıymdastyrýymen jáne «Rafe» meıramhanasy basshysynyń qoldaýymen Shymkentte alǵash ret kartıng sporttyq jarysy ótti. Atalǵan is-shara «Jas Team Kart» jobasy aıasynda júzege asty.
«Sport Villa» oıyn-saýyq kesheninde ótken týrnırge joǵary oqý oryndarynan 35 ókil qatysty.
Jastar resýrstyq ortalyǵynyń bólim basshysy Uljan Tólenniń aıtýynsha, jarysty uıymdastyrýdaǵy maqsat – stýdent jastardyń sabaqtan tys ýaqytyn tıimdi paıdalaný, sportpen shuǵyldanýǵa jol ashý, olardyń erik-jigeri men tabandylyǵyn qalyptastyryp, sport salasyn jastar arasynda keńinen nasıhattaý.
– Qazirgi kezde stýdentterdiń sabaqtan tys ýaqytta sportpen aınalysýǵa múmkindigi bolmaı jatatynyn ańǵardyq. Osyǵan baılanysty olardy sportqa tartyp, ýaqytyn tıimdi paıdalaný maqsatynda kóptegen sport túrin uıymdastyrýdamyz. Sonyń biri – búgingi «Jas Team Kart» jobasy aıasynda ótken kartıng sporttyq jarysy. Atalǵan joba jastardyń kóńil kúıin kóterip qana qoımaı, densaýlyǵyn da nyǵaıtatyny anyq. Osyndaı oıynǵa demeýshilik kórsetken «Sport Villa» oıyn-saýyq kesheni men «Rafe» meıramhananyń basshysyna óz alǵysymyzdy bildiremiz, – dedi ol.
Tartysty ótken kartıng sport jarysynda 7 komanda ózara saıysqa tústi. Oıynnyń sharty boıynsha qatysýshylar 3 aınalymdy eńserip, 5 mınýtta márege jetýi kerek.
– Búgingi kartıng sport jarysyna OQMPÝ stýdentteriniń arasynan komanda jasaqtap kelgen bolatynbyz. Osyndaı keremet jarysqa birinshi ret qatysyp, saıysqa tústik. Oıyn barysynda jańa dostar taýyp, sport salasyna óz úlesimizdi qostyq dep oılaımyn. Tartysty oıynǵa qatysýymyzǵa múmkindik bergen Jastar resýrstyq ortalyǵyna stýdentterdiń atynan alǵys aıtamyn, – dedi OQMPÝ stýdenti Baqbergen Muratuly.
Jarys jolynda júldege talasyp, naǵyz oıyn kórsetken sheberler qalalyq jastar resýrstyq ortalyǵynyń basshysy M.Isahovtyń arnaıy dıplomymen jáne kýbokterimen marapattalsa, qalǵan qatysýshylarǵa alǵyshattar tapsyryldy. Uıymdastyrýshylardyń aıtýynsha, sporttyq is-sharalar munymen toqtap qalmaıdy. Aldaǵy ýaqytta áli kóptegen oıyn túrin ótkizý josparlanyp otyr.
Aıta ketý kerek, bul jarysta birinshi bolyp márege Ońtústik Qazaqstan memlekettik pedagogıkalyq ýnıversıtetiniń stýdentteri jetti. Ekinshi oryndy M.Áýezov atyndaǵy Ońtústik Qazaqstan ýnıversıtetiniń jastary ıelendi. Al úshinshi orynǵa Jumabek Táshenov atyndaǵy ýnıversıtet túlekteri jaıǵasty.
ShYMKENT