Bul týraly Astana qalasy Qoǵamdyq densaýlyq saqtaý basqarmasy basshysynyń orynbasary Berik Qaıkenov onlaın brıfıngte málim etti, dep habarlaıdy Egemen.kz elorda ákimdiginiń resmı saıtyna silteme jasap.
Qazirgi ýaqytta el boıynsha maýsymdyq aýrýlar kezeńi júrip jatyr.
29 qyrkúıekten bastalǵan JRVI men tumaýdyń aǵymdaǵy epıdemııalyq maýsymynda Astana qalasynyń turǵyndary arasynda JRVI-dyń 7 myńǵa jýyq jaǵdaıy, onyń ishinde 14 jasqa deıingi balalar arasynda 4 myńnan astam jaǵdaı anyqtalǵan.
«Adamdardyń kópshiligi tumaýdy asa aýyr aýrýlardyń qataryna jatqyzbaıdy. Alaıda tumaý kezinde balalar, qart adamdar, sondaı-aq júrek pen ókpeniń sozylmaly aýrýlary bar adamdar úlken qaterde bolady. Tumaý ásirese joǵary qaýip tobyndaǵy adamdarda aýyr aýrýdyń damýyna jáne ólimge ákelýi múmkin ekenin umytpaýymyz kerek», dedi Berik Qaıkenov.
Onyń aıtýynsha, bir aı ishinde elordada júkti áıelder arasynda JRVI men tumaýdyń 542 jaǵdaıy tirkeldi. Táýligine 18 ótinish kelip tússe, onyń 3-eýi aýrýhanaǵa jatqyzyldy. 15 júkti áıel ambýlatorııalyq baqylaýda.
«Qazirgi ýaqytta Astanada JRVI-men syrqattanýshylyq ósýde, biz ony aýrýhanaǵa jatqyzylǵan júkti áıelder men balalardyń sanynan baıqap otyrmyz. Eger qyrkúıek aıynyń sońynda aýrýhanaǵa kúnine 3-4 áıel tússe, qazir ortasha aýyr jaǵdaıy bar 14-ten 16-ǵa deıin júkti áıel aýrýhanaǵa jatqyzylady. Tynys alý jetkiliksizdigi men pnevmonııanyń belgileri baıqalmaıdy. Barlyq pasıentter COVID-19-ǵa tekseriledi jáne oń nátıje joq», dep atap ótti basshy orynbasary.
Sondaı-aq Berik Qaıkenov turǵyndardy aýrýdyń alǵashqy belgilerinde ózin-ózi emdeýmen aınalyspaýǵa shaqyryp, turǵylyqty jeri boıynsha emhananyń fıltr kabınetterine júginý kerektigin atap ótti.