Túrkistanda qazaq ulttyq kúresinen «Turan Barysy» Azııa kýbogy aıaqtaldy. Alǵash ret uıymdastyrylǵan sharaǵa Túrkııa, О́zbekstan, Ázerbaıjan, Qyrǵyzstan, Vengrııa jáne Qazaqstan balýandary kúsh synady, dep habarlaıdy Egemen.kz.
Jarystar «qabyrǵadan qabyrǵaǵa» olımpıadalyq júıe boıynsha ótti. Sportshylar jeti salmaq dárejesi boıynsha beldesti: 55-ke deıin, 60-qa deıin, 66-ǵa deıin, 74-ke deıin, 82-ge deıin, 90-ǵa deıin jáne 90 keliden joǵary. Qazaqstandyq balýandar týrnır jeńimpazy atandy. О́zbekstan ókilderi ekinshi orynǵa taban tiredi. Al Qyrǵyzstan balýandary qola júldege ıe boldy.
Týrnırdiń fınaly tartysty ótti. Komandalar 3:3 esebimen alǵa shyǵyp, 90 keliden joǵary salmaq dárejesinde qazaqstandyq Ǵalymjan Qyryqbaı jeńiske jetti. Onyń qarsylasy ózbek Mýhsın Hısomıddınov tabandy qarsylyǵymen jáne laıyqty kúresimen jankúıerlerdiń qurmetine ıe boldy.
Týrnır ulttyq sportty damytý jáne qoldaý maqsatynda ótkizildi.
Mádenıet jáne sport mınıstri Dáýren Abaev qyzyqty jekpe-jek úshin sportshylarǵa alǵysyn bildirip, týrnırdiń joǵary deńgeıde ótetinine senim bildirdi.