Qasym-Jomart Toqaevty qoldaý jónindegi Respýblıkalyq qoǵamdyq shtabtyń músheleri óńirlerde saılaýshylarmen kezdesýdi jalǵastyryp keledi. Keshe kandıdattyń jaqtastary Qaraǵandyǵa kelip, óńirdiń bıznes-qaýymdastyǵymen, shahterlerimen jáne stýdent jastarymen kezdesti.
Qaraǵandy oblysynyń kásipkerlerimen áńgimelesý kezinde shtab músheleri kandıdattyń saılaýaldy baǵdarlamasynda kórinis tapqan ulttyq ekonomıkany damytý jáne jeke bıznesti yntalandyrý jónindegi basymdyqtardy talqylady.
Respýblıkalyq qoǵamdyq shtabtyń basshysy Erlan Qoshanov quramyna belgili qoǵam qaıratkerleri, Parlament Májilisiniń depýtattary, sarapshylar, jýrnalıster kiretin RQSh músheleri óńirlerde kandıdattyń saılaýaldy baǵdarlamasynyń negizgi erejelerin túsindirip, is-sharalardy belsendi ótkizip jatqanyn atap ótti. Úgit-nasıhat naýqanynyń alǵashqy kúnderi el aýmaǵynda 5 myńnan astam úgit-nasıhat is-sharasy uıymdastyrylǵan.
О́z kezeginde Respýblıkalyq qoǵamdyq shtabtyń múshesi Toqtar Áýbákirov 20 qarashada azamattarymyzdy daýys berýge shaqyrdy. «Bul tańdaý elimizdiń aldaǵy jeti jyldaǵy damý baǵytyn aıqyndaıdy. Barsha qazaqstandyqtardyń azamattyq belsendilik tanytyp, saılaý ýchaskelerine kelgeni mańyzdy», dedi ol.
Sondaı-aq shtab músheleri E.Bóketov atyndaǵy Qaraǵandy ýnıversıtetiniń stýdentteri jáne oqytýshy-professorlar quramymen kezdesip, Qasym-Jomart Toqaevtyń jastarǵa jáne bilim berýge qatysty saıasatyna basa nazar aýdardy.