Qazaqstan Respýblıkasynyń prezıdenttigine kandıdat Jıgýlı Daırabaev Aqmola oblysynyń Arshaly aýdanyna qarasty Anar aýylyndaǵy saılaýshylarmen kezdesti. Atalǵan eldi mekendegi «Aıan» JShS tynys-tirshiligimen tanysty.
Kezdesýde kandıdat jurtshylyqty óziniń saılaýaldy baǵdarlamasynyń negizgi baǵyttarymen tanystyrdy. «Aıan» JShS un tartýmen, un, makaron ónimderin óndirýmen aınalysady. Astana mańynda paıda bolǵan alǵashqy otandyq kásiporyndardyń biri sanalatyn seriktestik elordanyń azyq-túlik beldeýine engen. Kásiporyn turaqty jumys isteıdi, alaıda sońǵy kezdegi astyq baǵasynyń kúrt ósýine baılanysty belgili bir qıyndyqtar týyndaǵan. Kompanııanyń óz alqabynan alǵan birshama shıkizaty bar. Biraq ol máseleni sheshpeıdi.
– Bul turǵydan kelgende mundaı kásiporyndar naryqta arzan shıkizat izdep alasurmaı, shıkizat jetkizýshilerin naqty anyqtap, aınalasynda ornalasqan taýar óndirýshilermen eki jaqqa da qolaıly baǵamen uzaq merzimdi perspektıvada jumys isteýi kerek. О́ńdeý kásiporyndary nesıeleriniń paıyzdyq mólsherlemesin sýbsıdııalap, olarǵa fermerlerden aýylsharýashylyq ónimderin arzan nesıelermen satyp alatyn jaǵdaı jasaýǵa bolady. Sonda fermerlerdiń de, un tartýshylardyń da, eń bastysy, un men nan tutynýshylardyń, ıaǵnı Qazaqstannyń barlyq azamatynyń múddesi qorǵalady. Biz eksportqa baǵdarlanǵan elmiz, sol sebepti astyq baǵasyn turaqtandyrý maqsatynda eksportty jabýǵa bolmaıdy, – dedi J.Daırabaev.