Qazaqstan Respýblıkasynyń prezıdenttigine kandıdat Jıgýlı Daırabaev Qaraǵandy oblysynda bolyp, «Fıtohımııa» halyqaralyq ǵylymı-óndiristik holdınginiń qyzmetimen tanysty. Kandıdat kásiporyn ǵalymdarymen kezdesip, olardyń ǵylym salasyn damytýǵa qatysty pikirlerin tyńdady.
«Fıtohımııa» holdıngi – Qazaqstan men Ortalyq Azııanyń ósimdik shıkizaty negizinde daıyndalatyn biregeı dárilik preparattardyń jetekshi ázirleýshisi. Búginde kásiporyn ósimdik shıkizatyn óńdeýden, sýbstansııany alýdan bastap daıyn dárilik nysandardy, biregeı fıtopreparattardy óndirýge deıingi tolyq tehnologııalyq sıkl engizilgen farmasevtıka salasyndaǵy ınnovasııalyq jobalardy iske asyrýmen aınalysady.
Holdıngtiń quramyna ǵylymı keshenniń ózi ornalasqan botanıkalyq baq kiredi. Alaıda keıbir memlekettik qurylymdar turǵyn úı keshenin salý maqsatynda ǴZI botanıkalyq baǵynyń jerlerine kóz tikken syńaıly.
«Bul jerlerdi kásiporynnan turǵyn úı keshenin salý úshin alýǵa bolmaıdy. Men ǵylymı-zertteý, aǵartýshylyq jáne zertteý maqsatynda tiri ósimdikterdiń kolleksııalary zertteletin jáne kórsetiletin aýmaqty joıýmen múldem kelispeımin. Tehnologııalardyń damýymen jáne adamzattyń jańa jetistikterimen ósimdikterdi jáne olardyń aýrýlardy emdeýdegi múmkindikterin tereń zertteý burynǵydan da ózekti bolyp qala beredi», dedi Jıgýlı Daırabaev.