L.N.Gýmılev atyndaǵy Eýrazııa ulttyq ýnıversıteti Jýrnalıstıka jáne saıasattaný fakýltetinde fılologııa ǵylymdarynyń kandıdaty Ǵalııa Aqseıittiń «Sapar Baıjanovtyń pýblısıstıkasy» atty monografııasynyń tusaýkeseri ótti.
Kitap tusaýkeserine Sapar Baıjanovtyń jary Kúlásh Beısenbekqyzy, Parlament Májilisiniń depýtaty Saýytbek Ábdirahmanov, EUÝ jýrnalıstıka jáne saıasattaný fakýltetiniń dekany Saq Qaırat О́mirbaıuly men ujym ókilderi, qarymdy jýrnalıst Saırash Ábishqyzy qatysty. Jıyn barysynda Sapar Baıjanovqa qatysty jyly estelikter aıtylyp, jýrnalıstıkaǵa qosqan eńbegi men ómirlik ónegesi sóz boldy.
«Alyptardyń izin basyp, qazaq jýrnalıstıkasyna úlken qoltańba qaldyrǵan, ózindik dara jol salǵan, tilshilikten bastap jýrnalıstıkanyń satylarynan órlep, bas redaktor deńgeıine kóterilgen Sapar Baıjanov aǵamyzdyń shyǵarmashylyǵyna arnalǵan kitaptyń tusaýkeser rásimine jınalyp otyrmyz. Bul kitap endigi jerde jas jýrnalısterdi daıyndaýǵa qyzmet etetin bolady. Aǵamyzdyń baı tájirıbesin, ómirlik, shyǵarmashylyq úlken ónegesin úırenip, kelesi býynǵa amanattaý osy otyrǵan bárimizdiń mindetimiz», dedi fakýltet dekany Saq Qaırat О́mirbaıuly.
Budan soń, Saq Qaırat, Kúlásh Beısenbekqyzy, Saýytbek Ábdirahmanov saltanatty túrde kitaptyń lentasyn qıdy. Almatydan arnaıy kelgen Kúlásh Beısenbekqyzy kitap avtory Ǵalııa Aqseıitke óz iltıpatyn bildirdi.
«Men Ǵalııaǵa óte rızamyn. Sapar Baıjanovty 10 jyl zerttep, dıssertasııasyn jaqsy qorǵap shyqty. Endi mine, sol eńbektiń arqasynda monografııasy jaryq kórip otyr. Sapar Baıjanovtyń jazyp ketken 22 úlkendi-kishili kitabymen jaqyn tanysý Ǵalııaǵa ońaı soqpaǵany anyq», dedi Kúlásh Beısenbekqyzy.
Sonymen qatar talantty stýdentter án aıtyp, kúı shertti.
Aıta keteıik, jazýshy Sapar Baıjanov «Halyqtar dostyǵy», «Qurmet belgisi» ordenderiniń ıegeri. 1973-1983 jyldar aralyǵynda qazirgi «Egemen Qazaqstan» gazetiniń redaktory bolǵan.
Saltanat KENJEBAI,
EUÝ 3- kýrs stýdenti