Qazaqstan Respýblıkasy prezıdenttigine kandıdat Qaraqat Ábden Aqtóbe qalasynyń saılaýshylarymen kezdesý ótkizdi. Saılaýaldy jıynda úmitker jergilikti turǵyndarmen, isker áıelder qaýymdastyǵynyń ókilderimen urpaq tárbıesi jóninde oı bólisti.
Ol jıyn barysynda óziniń saılaýaldy baǵdarlamasyn tanystyryp, áleýmettik sala, áıeldiń qoǵamdaǵy róli men kópbalaly áıelderdiń jaǵdaıy týraly sóz qozǵady. «Bir qolymen besik, ekinshi qolymen álemdi terbetken kópbalaly analar qoǵamǵa, jastarǵa úlgi bolýy kerek. Kópbalaly ana bolý – naǵyz erlik. Búgingi kezdesýge kelgen aqtóbelik áıelder qaýymy sonyń jarqyn úlgisi. Olardyń belsendilik tanytyp júrgeni qýantady. El ıgiligi úshin áıelderdiń kóshbasshylyq qasıetterin durys baǵytta damytý, ejelden qalyptasqan ulttyq qundylyqtardy saqtaý mańyzdy», dedi Qaraqat Ábden.
Jıynǵa qatysqan áıelder qaýymy bala tárbıesindegi til máselesiniń ózektiligin de atap ótti. «Áıel otbasynda da, iskerlik baǵytta da jetistikke jetý úshin jan-jaqty bolyp, izdený, ózin damytý kerek ekendigin túsindim. Qaraqat Ábden bizge úlken motıvasııa berdi», dedi Aqtóbe qalasynyń isker áıelder keńesiniń jastar qanaty tóraǵasy Maıra Saýyrbaeva.
Qaraqat Ábden buǵan deıin Aqmola oblysy, Qaraǵandy, Astana, Ekibastuz, Semeı, Pavlodar, Talǵar, Esik qalalarynyń turǵyndarymen kezdeskenin atap ótken jón.