QR SIM Tehnıkalyq retteý jáne metrologııa komıtetiniń tóraǵasy Qýanysh Elikbaev Ortalyq kommýnıkasııalar qyzmetinde ótken brıfıngte bıylǵy memlekettik baqylaýdyń qorytyndylary týraly aıtty, dep habarlaıdy Egemen.kz QR SIM baspasóz qyzmetine silteme jasap.
Tóraǵanyń aıtýynsha, jyl basynan beri aýmaqtyq departamenttermen memlekettik baqylaýǵa alynǵan myńnan astam tekserý is-sharalary júrgizilgen. Onyń ishinde 865 jaǵdaıynda zań buzýshylyqtar anyqtalǵan.
«122 uıǵarym berildi, ákimshilik quqyq buzýshylyq týraly is boıynsha 155 qaýly shyǵaryldy. Ákimshilik aıyppul somasy 140,6 mln teńgeni qurady, bul byltyrǵymen salystyrǵanda 77%-ǵa joǵary», dedi Qýanysh Elikbaev.
Sondaı-aq 70 akkredıtteý sýbektisi tekserilip, 39 sýbektide zań buzýshylyqtar anyqtalǵan.
Nátıjesinde 6 aıǵa birneshe zerthana men sertıfıkattaý organdarynda 4 akkredıtteý attestatynyń qoldanylýy toqtatylyp, 2,4 mln teńgege aıyppul salynǵan.
Departament 570 zergerlik buıym satýshyǵa qatysty profılaktıkalyq baqylaý júrgizip, 458 jaǵdaıda quqyq buzýshylyqtar anyqtaǵan.
«Bul satýshylar synaqtan, taldaýdan jáne tańbalaýdan ótpegen taýarlardy satqan. Iаǵnı Qazaqstan tańbasy joq, Qazaqstanda synamasy rastalmaǵan zergerlik buıymdar», dep atap ótti tóraǵa.
Brıfıng barysynda Qýanysh Elikbaev memlekettik baqylaý - naryq aınalymyndaǵy ónimderdiń qaýipsizdigin qamtamasyz etýge basymdyq bere otyryp, turaqty negizde júrgizilip jatqanyn aıtty. Onyń ishinde sur sertıfıkattarmen kúres te kúsheıgenin málimdedi.