Elimizdiń ár óńirinen kelgen 18 murajaıdyń baǵa jetpes qundy jádigerleri Qaraǵandy jurtynyń nazaryna usynyldy. Bul Qazaqstan murajaılarynyń qory arqyly tuńǵysh ret uıymdastyrylǵan kórme ekenin atap ótken jón.
«О́tken men bolashaq arasynda» dep atalǵan kórme Qaraǵandy oblystyq tarıhı-ólketaný murajaıynyń 90 jyldyǵyna oraılastyryldy. Sonymen qatar halyqaralyq deńgeıdegi «Murajaı pedagogıkasy: dástúrler men ınnovasııalar» atty halyqaralyq semınar-trenıngte murajaıdyń mıssııasyna qatysty keleli máseleler qozǵaldy.
– Bul – jaı jádigerlerdiń ǵana kórmesi emes, oblystyq murajaılardyń biregeı kórmesi. Ár murajaı kórmege arheologııa, etnografııa, qoldanbaly ónerdiń sırek kezdesetin 5-6 eksponatyn ákelip otyr. Mundaı respýblıkalyq kórme Qazaqstanda alǵash ret ótip otyr, – deıdi Qaraǵandy oblystyq tarıhı-ólketaný murajaıynyń dırektory Erjan Nurmaǵanbetov.
Kórmede elimizdiń ár aımaǵynan tabylǵan «Altyn adamnyń» áshekeıleri de bar. Tulǵalardan qalǵan asyldyń synyǵyndaı jádigerler, olar tutynǵan, ustaǵan qural-jabdyqtar da kórmeniń qunyn arttyra túsken. Máselen, Qostanaı oblystyq tarıhı-ólketaný murajaıy Amangeldi Imanovtyń dombyrasyn ákelipti. Jangeldınniń murajaı kesheni jetkizgen 1909 jyly Peterborda jaryq kórgen Ahmet Baıtursynulynyń «Qyryq mysal» jınaǵyn kórýdiń ózi bir ǵanıbet.
Ábilqaıyr han saqınasynyń kóshirmesi, Eset batyrdyń, Arynǵazy hannyń saýytsaımandary kórme qundylyǵyn kórsetse kerek-ti.
Aqtóbe oblystyq tarıhı-ólketaný murajaıy qazaq batyrlarynyń saýyt-saımandaryn ala kelipti. Murajaı qory bóliminiń meńgerýshisi Nurbolat Ǵabbasov jádigerlerdiń basym bóligi tupnusqa ekenin aıtady.
– Aqtóbe – batyrlar mekeni. Biz qaıta qalypqa keltirilgen Qobylandy batyr músinin, Eset batyrdyń, Arynǵazy hannyń saýyt-saımandaryn ákeldik. Turmysta tutynǵan tabaq, ojaý, qymyzshara degenniń bári túpnusqa. Ábilqaıyr han saqınasynyń kóshirmesi de bar bizde, – deıdi Nurbolat Ǵabbasov.
Kórmeden soń jumysyn bastaǵan semınar-trenıngke Reseı ǵalymdary da qatysty. Ǵalymdar mýzeıdiń mánin negizdeı tústi. Murajaı dırektory Erjan Nurmaǵanbetovtiń «murajaı – tek tarıh qoımasy ǵana emes, ol – ǵylymı-zertteý, kommýnıkasııa ortalyǵy. Munda tarıh, bilim, týrızm jınaqtalǵan» degen pikirin Reseı ǵalymy, dosent, pedagogıka ǵylymdarynyń kandıdaty, Reseı Federasııasy Joǵary mektebiniń eńbek sińirgen qyzmetkeri, Halyqaralyq mýzeologııa komıtetiniń jáne IýNESKO-nyń Halyqaralyq murajaılar keńesiniń múshesi Lıýdmıla Shlıathına da maquldaıdy.
Ǵalymnyń aıtýynsha, qazirgi álemdegi murajaılardyń mıssııasy – bardy máńgilik etý, ataýsyz qalǵandy ulyqtaý, júzege aspaı qalǵandy is qylý bolmaq.
QARAǴANDY