Senat Tóraǵasy Máýlen Áshimbaev TMD-ǵa múshe memleketterdiń Parlamentaralyq Assambleıasy baıqaýshylar mıssııasynyń ókilderimen kezdesti, dep jazady Egemen.kz.
Kezdesýdi ashqan Máýlen Áshimbaev parlamentshilerge Qazaqstan Prezıdentiniń saılaýyn baqylaýǵa qatysqany úshin alǵys bildirdi. Sondaı-aq Palata Spıkeri elimiz halyqaralyq baıqaýshylardyń saılaýǵa qatysýyna úlken mán beretinin jáne obektıvti monıtorıng úshin barlyq qajetti jaǵdaı jasalǵanyn atap ótti.
Senat Tóraǵasy saılaýdy tolyǵymen ulttyq zańnamaǵa jáne osy saladaǵy halyqaralyq standarttarǵa sáıkes ótkizý úshin qajetti sharalar qabyldanǵanyn da tilge tıek etti. Barlyq kandıdat úshin saılaý aldyndaǵy úgit-nasıhat jumystaryn júrgizýge teń jaǵdaı jasalǵany da nazardan tys qalǵan joq.
Sonymen qatar Senat Spıkeri Parlamenttiń elimizde júrgizilip jatqan reformalardy zańnamalyq turǵydan qamtamasyz etý baǵytyndaǵy jumysyna toqtaldy. Adam quqyqtaryn qorǵaý júıesin nyǵaıtýǵa, bılik tarmaqtary men ortalyq pen aımaqtar arasyndaǵy ókilettikter men jaýapkershiliktiń tepe-teńdigin qamtamasyz etýge arnalǵan jaqynda qabyldanǵan konstıtýsııalyq zańdar týraly da sóz boldy.
«Qabyldanǵan konstıtýsııalyq zańdar azamattarymyzdyń suranystary men múddelerine saı keletin jańa saıası model qalyptastyrýǵa septigin tıgizedi dep senemiz. Jańa normalar azamattardyń memlekettik jáne saıası ınstıtýttarǵa degen senimin nyǵaıtýǵa da yqpal etedi. Aldaǵy prezıdent saılaýy qazaqstandyqtardy demokratııalyq transformasııa men reformalar ıdeıasy tóńireginde biriktire túsedi dep úmittenemiz», dedi Máýlen Áshimbaev.
О́z kezeginde TMD PAA baıqaýshylar mıssııasynyń koordınatory Dılrabo Mansýrı saılaý prosesiniń jalpyǵa birdeı qabyldanǵan demokratııalyq standarttarǵa sáıkes joǵary deńgeıin atap ótti. TMD PAA parlamentshileri senatorlarǵa kóp jylǵy ózara is-qımyl úshin alǵysyn bildirip, parlamentaralyq yntymaqtastyqty odan ári nyǵaıtýǵa múddeli ekenderin de jetkizdi.