Premer-Mınıstr Álıhan Smaıylov elimizde ótken Prezıdent saılaýy aıasynda Úkimet jumysynyń aldaǵy jyldarǵa belgilengen negizgi baǵyttaryn atap ótti, dep habarlaıdy Egemen.kz Úkimettiń baspasóz qyzmetine silteme jasap.
Úkimettiń kezekti otyrysyn asha otyryp, Álıhan Smaıylov Ortalyq saılaý komıssııasynyń aldyn ala qorytyndysy boıynsha Qasym-Jomart Kemeluly Toqaev aıqyn basymdyqpen jeńiske jetkenin aıtty.
Onyń kandıdatýrasyn parlamenttik partııalar men iri qoǵamdyq uıymdardy biriktirgen Halyqtyq koalısııa usynǵan bolatyn jáne Qazaqstan halqy jappaı óz qoldaýyn bildirdi.
«Úkimettiń aldaǵy jeti jyldaǵy negizgi mindeti – saılanǵan Memleket basshysynyń saılaýaldy baǵdarlamasyn sapaly iske asyrý. Ekonomıkada, áleýmettik salada jáne óńirlik saıasattaǵy túbegeıli ózgerister osy saılaýaldy baǵdarlamanyń negizi bolmaq. Barlyq memlekettik organdar men vedomstvolar osy maqsat úshin, ıaǵnı ádiletti Qazaqstan qurý jolynda halyqtyń múddesine saı kúsh biriktirip, jumyla eńbek etýi tıis. Biz áleýmettik-ekonomıkalyq máselelerdi sheshýge baǵyttalǵan barlyq strategııalyq qujattardyń, baǵdarlamalar men jobalardyń naqty iske asýyn qamtamasyz etýimiz kerek. Úkimettiń jumysy negizinen ekonomıkany demonopolızasııalaýǵa, kásipkerlik qyzmetti yntalandyrýǵa jáne azamattardyń tabysyn arttyrýǵa, bilim berý men densaýlyq saqtaý júıelerin jańǵyrtýǵa jáne halyqtyń tabysyn arttyrýǵa baǵyttalady», dedi Álıhan Smaıylov.