Halyq tańdaýy – senimdi kóshbasshy

Ortalyq saılaý komıs­sııa­sy­nyń tóraǵasy Nurlan Ábdi­rovtiń máli­metinshe, Qasym-Jomart Toqaevqa 6 mln 456 myń 392 saılaýshy daýys bergen. «Bárine qarsymyn» baǵanyn 460 484 (5,8%) saılaýshy tańdaǵan. Jıgýlı Daırabaevqa – 271 641 (3,42 paıyz), Qaraqat Ábdenge – 206 myń 206 (2,6 paıyz), Meıram Qajykenge – 200 907 (2,53 paıyz), Nurlan Áýesbaevqa – 176 116 (2,22 paıyz) jáne Saltanat Tur­synbekovaǵa 168 731 (2,12 paıyz) daýys berilgen.

«Saılaýdyń aldyn ala qo­ry­tyndylary resmı kelip tús­ken hattamalarmen rastaldy. Qazaqstan Respýblıkasynyń saılaý týraly Konstıtýsııalyq zańynyń 9-baby 1-tarmaǵyna, 65-babyna sáıkes, daýys berýge qatysqan saılaýshylardyń 50 paıyzdan astamynyń daýysyn al­ǵan kandıdat respýblıka pre­zı­denti bolyp sanalady. Osy­laısha, 2022 jylǵy 20 qara­shadaǵy kezekten tys saılaýda Qasym-Jomart Kemeluly Toqaev Qazaqstan Respýblıkasynyń Prezıdenti bolyp saılandy», dedi Nurlan Ábdirov.

Áý basta saılaýshylar sany 11 mln 953 myń 465 adamdy qura­ǵany belgili. Dese de 8 mln 300 myń 46 adam nemese 69,44 paıyzy daýys berýge arnal­ǵan bıýlletenderdi toltyr­ǵan. Daýys berý kúni prezıdent­tikke kandıdattardyń 11 myń­nan asa senim bildirgen adam­dary, sheteldik halyqaralyq uıym­dardyń 641 baıqaýshysy, saıası par­tııalardyń 15,5 myńnan asa baı­qaýshysy, qoǵamdyq birlestik­terden 30 myńnan asa baıqaý­shy saılaýdy baqylaǵan. Saılaý ýchas­kelerinde 1 225 qazaqstan­dyq BAQ ókili, 23 eldiń 41 she­teldik BAQ-tyń akkredıttelgen jýrnalısi aqparat taratqan.

Nurlan Ábdirov prezıdent saılaýy ulttyq zańnama men halyq­aralyq mindettemelerge saı júzege asyrylǵanyn aıtty.

«Saılaýdy ázirleý men ótki­zýdi uıymdastyrý Qazaqstan Res­pýblıkasynyń ulttyq zańna­masyna jáne halyqaralyq mindettemelerine, ashyqtyq jáne aıqyndyq qaǵı­dattaryna sáıkes júzege asyryldy. Ýchaskelerde mú­gedektigi bar aza­mattardyń daýys berýi úshin yńǵaıly jaǵ­daı jasaldy. Kórý qabileti na­shar azamattar úshin alǵash ret saılaý bıýlletenderine Braıl qarpimen trafaretter jasalyp, onymen barlyq saılaý ýchaskeleri qamtamasyz etildi», dedi N.Ábdirov.

Daýys berý kúni saılaý rásimderin kandıdattardyń 11 myńnan astam senim bildirgen adamy, 45 myńnan astam ulttyq jáne halyqaralyq baıqaýshy baqylady. «Olardyń qyzmeti saılaýshylar men saılaý pro­sesine qatysýshylardyń quqyq­taryn qamtamasyz etýge oń yq­pal etti. Baıqaýshylar men sarap­shylar saılaýshylardyń óz aza­mattyq ustanymy men elekto­rattyq belsendiligin tany­typ qana qoımaı eldiń múd­desi men bolashaǵy jolyn­da saıası jaýapkershilik tanyt­qanyn, sondaı-aq saıası naýqan­nyń joǵary deńgeıde uıymdas­tyrylǵanyn, saılaý komıssııalary músheleriniń kásibı daıarlyǵyn, tehnologııalyq jańalyqtardyń engizilgenin jáne saılaý ýchaskeleriniń tıisinshe qamtylǵanyn erekshe atap kórsetti», dedi Nurlan Ábdirov.