Qostanaıdaǵy Ybyraı Altynsarın memorıaldyq mýzeıinde uly aǵartýshynyń murasyn tárjimalap, zerttep, nasıhattap júrgen ǵalym, Túrkııadaǵy Mýǵla Sytky Kochman ýnıversıtetiniń dosenti, PhD Ekrem Aıanmen kezdesý ótti. Eki saǵatqa sozylǵan emen-jarqyn áńgimeniń basynda óńir zııalylary, mýzeı qyzmetkerleri men daryndy balalarǵa arnalǵan Ybyraı Altynsarın atyndaǵy gımnazııanyń shákirtteri boldy.
Ekrem Aıan qazir Arqalyq qalasyndaǵy pedagogıka ınstıtýty stýdentterine bir aılyq dáris oqyp júr. Qostanaıǵa oblys shetine at basyn tirep turyp, Tobyldyń jaǵasynda jatqan Ybyraı atamyzdyń basyna baryp, zııarat etip, taǵzym jasamaı ketken jaramas degen nıetpen kelipti.
Túrkııada «Modern Kazak Edebiyatının Öncüsü Ibıray Altınsarin» atty taqyrypta doktorlyq dıssertasııa qorǵaǵan ǵalym Ybyraıdyń jastardy oqý-bilimge, ónerge shaqyrǵan óleń-áńgimelerin, Abaı poezııasy men qarasózderin, qazaq dastandaryn túrik tiline aýdarǵan.
– Alǵash Ybyraı Altynsarınniń «Musylmanshylyqtyń tutqasy» atty shyǵarmasymen tanystym. Ol kezeńde mundaı eńbek jazý úshin úlken júrek kerek dep oıladym. Osy kitapty oqyp shyqqannan keıin, Ybyraı murasyna odan saıyn qyzyǵyp, izdene tústim. Túrikterde «Basyn qoltyǵyna qysyp qydyrdy» degen sóz bar. Bul sóz basyna qaýip tónip turǵanyna qaramastan, el múddesi úshin shybyn janyn shúberekke túıip júrip, úlken táýekelge baryp, qaırat qylǵan, qyrýar is tyndyrǵan adamdarǵa qatysty aıtylady. Ybyraı Altynsarın de – sondaı adam. Men onyń «Musylmanshylyqtyń tutqasynan» bólek, «Qazaq hrestomatııasyn», basqa da eńbekterin túrik tiline aýdaryp, ádebı-tildik turǵydan taldaý júrgizdim. Jalpy, Qazaqstan óz táýelsizdigine beıbit kúres jolymen jetken el. Bul kúres qalammen jasalǵan. Onyń basynda Ybyraı, Abaı, Álıhan, Ahmet sııaqty alyptar tur, – deıdi Ekrem Aıan.
Basqosý barysynda Serikbaı Ospanuly, Aqylbek Shaıahmet syndy óńir zııalylary da sóz alyp, qadirmendi qonaqqa izgi tilek arnap, iltıpat bildirdi.
– Keńestik kezeńde Túrkııamen aramyz onsha durys bolǵan joq. Ol kezde Nazym Hıkmet pen Áziz Nesındi ǵana biletin edik. Qazir, Allaǵa shúkir, Iýnýs Emreni, Orhan Pamýkti, Farýk Nafyz Chamlybeldi, Túrik Respýblıkasynyń negizin qalaǵan Atatúrktiń kim ekenin, Erdoǵannyń kim ekenin bilip jatyrmyz. Bizdiń Qazaq memleketiniń táýelsizdigin eń alǵash moıyndaǵan baýyrlas Túrkııa memleketi ekenin umytpaımyz. Sondyqtan Túrkııaǵa arqa súıeımiz. Men Túrkııanyń úsh festıvaline qatystym. Sonda baıqaǵanym – Túrkııadaǵy kardashtardyń túrkimen, ózbek, qyrǵyz, ásirese qazaq baýyrlarǵa degen yqylasy men peıili. Sol peıil máńgilik, qyzmetiń jemisti bolsyn! – dedi Aqylbek Shaıahmet.
Kezdesý sońynda oblystyq mádenıet basqarmasynyń basshysy Erlan Qalmaqov qadirmendi qonaqqa alǵys aıtyp, tartý-taralǵy tabys etti.
Qostanaı oblysy