Aqsý ferroqorytpa zaýyty tundyrý kesheniniń qýatyn 70 paıyzǵa arttyrdy. Buryn tek jyly mezgilde jumys istep kelgen bólimsheniń óndiristik korpýsy jylytyldy. Endi ol jyl boıy jumys isteıtin boldy. Nátıjesinde, 60 jańa jumys orny ashylǵan. Jobaǵa 2,5 mlrd teńgeden astam qarajat quıyldy.
Tundyrý kesheni kásiporynda 2010 jyly «Qazhrom» kompanııasynyń úzdik álemdik ekologııalyq standarttar men qaldyqsyz óndiristerge umtylýy aıasynda salynǵan bolatyn. Bul – qoj óńdeý sehyndaǵy jeti keshenniń biri. Munda qundy ónim gravıtasııalyq ádispen alynady. Prosess kezinde sý paıdalanylady. Sondyqtan keshen jyldyń tek jyly mezgilinde jumys istedi.
– Qaldyqtardy durys paıdalaný – zamanaýı tıimdi óndiris negizderiniń biri. Jylytylǵan keshende 1,6 mln tonnaǵa deıin materıal óńdeýge bolady. Osylaısha, biz qordalanyp qalǵan qojdardy óńdeý kólemin arttyrý máselesin sheshe alamyz. Keshen zaýyttyń tuıyqtalǵan aınalym sýyn ǵana paıdalanǵandyqtan, prosestiń energııa tıimdiligi artady, – deıdi Aqsý ferroqorytpa zaýytynyń dırektory Valentın Chıchıhın.
Keshen jyl boıǵy jumys tártibine aýysýyna oraı kásiporynnyń avtokólik sehyna qosymsha 60 júrgizýshi qyzmetke qabyldandy. Jańa 7 úlken aýyrjúktasyǵysh avtosamosval jáne 4 júk tıegish satyp alynǵan. Adamdar da, tehnıkalar da táýlik boıy jumys isteıdi.
Keshen óndirisin arttyrý jobasy munymen aıaqtalǵan joq. Kelesi jyly Aqsý ferroqorytpa zaýytynyń tehnologteri eń usaq klasty materıaldardy óńdeýge arnalǵan jylytylǵan jeliniń úshinshisin salýdy josparlap otyr.