Parlament Senatynda «Qazaqstan Respýblıkasy turǵyn úı qurylysyn damytý: problemalary jáne olardy sheshý joldary» týraly úkimet saǵaty ótti, dep habarlaıdy Egemen.kz Parlament Senatynyń baspasóz qyzmetine silteme jasap.
Palata Tóraǵasynyń orynbasary Olga Perepechına úkimet saǵatyn asha kelip, qazaqstandyqtardy turǵyn úımen qamtamasyz etý máselesi mańyzdy bolyp qala beretinin atap ótti. Ol qurylys salasynyń ósý qarqynyn saqtaý ulttyq ekonomıkanyń damýy men básekege qabilettiligin arttyrýǵa tikeleı yqpal etetinin jetkizdi.
«Búginde Qazaqstannyń jalpy ishki ónimindegi qurylystyń úlesi 6%-dan sál asady. Sonymen birge BUU Eýropalyq ekonomıkalyq komıssııasynyń málimeti boıynsha, 2010 jyly bizde bul kórsetkish 8% deńgeıinde boldy. Sonymen qatar osy ekonomıkalyq kórsetkishter boıynsha Qazaqstan Ázerbaıjan men Armenııa sııaqty TMD elderinen, sondaı-aq Baltyq jaǵalaýy elderi - Lıtva men Estonııadan tómen bolyp otyr. Sondyqtan qurylys salasynyń ósý qarqynyn saqtaý ulttyq ekonomıkanyń damýy men básekege qabilettiligin arttyrýǵa tikeleı yqpal etedi», dedi Olga Perepechına.
Senator Serik Shaıdarov óz kezeginde Úkimettiń nazaryn turǵyn úı qurylysy salasyndaǵy naqty problemalarǵa aýdardy. Atap aıtqanda, qurylys jumystary sapasynyń tómendigi, memlekettik satyp alý tetikteriniń jetilmegeni, qurylys materıaldarynyń qymbattaýy, sondaı-aq aýyldyq jerlerde turǵyn úımen qamtamasyz etý jónindegi baǵdarlamalardyń joqtyǵy týraly aıtyldy.
«Osy problemalardy eskere otyryp, Úkimet memlekettiń jer qoryn esepke alyp jáne turǵyn úı men áleýmettik nysandardyń birkelki qurylysyn boljap júrgizýge oraı qalalardyń bas josparyn ázirleý tásilderin qaıta qaraýy qajet. Sondaı-aq Úkimetke memleket múddesi men turǵyn úı qurylysynyń qarqynyn arttyrý úshin jaǵdaı jasaý qajettigin eskere otyryp, osy problemalardy sheshýdiń ońtaıly tetikterin ázirleýdi usynamyn», dedi senator Shaıdarov.
Úkimet saǵaty barysynda Indýstrııa jáne ınfraqurylymdyq damý mınıstriniń mindetin atqarýshy Erkebulan Daýylbaev, Túrkistan jáne Abaı oblysynyń basshylyǵy, «Otbasy Bank» AQ Basqarma tóraǵasy Lázzat Ibragımova, sondaı-aq Ulttyq ekonomıka mınıstriniń orynbasary Baýyrjan Omarbekov baıandama jasady.
Sharany júrgizip otyrǵan Ekonomıkalyq saıasat, ınnovasııalyq damý jáne kásipkerlik komıtetiniń tóraǵasy Dáýren Ádilbekov úkimet saǵaty barysynda ázirlengen usynystardy atap ótti. Úkimet ol usynystardy asa muqııat baqylaýǵa alýy tıis.
«Qurylys kólemin ulǵaıtý, halyqtyń turǵyn úı jaǵdaıyn jaqsartýda memlekettik qoldaý sharalarynyń ataýly bolýy men tıimdiligin arttyrý talap etiledi. Qurylys materıaldarynyń ımportyn azaıtýǵa, sondaı-aq otandyq qurylys ónimderin óndirý naryǵyn damytýǵa baǵyttalǵan sharalar qabyldanýy kerek. Sondaı-aq eskirgen turǵyn úı qoryna baılanysty máselelerdi sheshý tásilderin ázirleý qajet», dep atap ótti Dáýren Ádilbekov.
Jumys qorytyndysy boıynsha Senat depýtattary ázirlengen osy jáne basqa da usynymdar Úkimetke jiberiledi.