Aýyl túrlene túsedi

Memleket basshysy ant qabyldaǵan­nan keıin aldaǵy josparlardy naqty tizbektep berdi. Ásirese alǵashqy Jarlyqtyń aýyldyń áleýetin arttyrýmen baılanysty bolǵany kópshiliktiń kóńilinen shyqty. Shyny kerek, elimizdegi qordalanǵan máselelerdiń basym bóligi aýyldyq jerlerde. Aýyldardyń damýyna jaǵdaı jasaý – memlekettik saıasattyń asa mańyzdy strategııalyq maqsattarynyń biri. Aýyl turǵyndarynyń ómir súrý sapasy men ál-aýqatyn jaqsartý jáne aýyldardyń ınfraqurylymyn damytý – mańyzdy is. Memleket basshysy óz sózinde: «Osy qujat arqyly Úkimetke aýyldy damytýdyń 5 jylǵa arnalǵan naqty josparyn ázirleýdi tapsyramyn. Bul meniń jańa prezıdenttik merzimdegi birinshi Jarlyǵym bolady. Úkimet aýyldy damytýǵa arnalǵan barlyq jobany júıeli túrde rettep, jınaqtaýǵa tıis. Sodan keıin maqsatty túrde tıimdi jumys júrgi­zemiz», dedi. Iаǵnı aldaǵy bes jylda aýyl­dardyń ajary artyp, turǵyndardyń tur­mys sapasy joǵary bolady degen senim mol. Sońǵy jyldary «Aýyl – el besigi» baǵ­darlamasy sheńberinde táýelsizdik alǵan jyl­dardan beri jóndeý kórmegen aýylǵa kire­beris joldarǵa asfalt tóselip, turǵyn­dar máre-sáre kúı keship jatqany ras. Qala berdi, aýyldaǵy áleýmettik ǵımarat­tar jańartylyp, jańa nysandar saly­nyp, ıgi ister jalǵasyn taýyp jatyr. Mem­le­ket basshysynyń Jarlyǵynan keıin bul baǵyttaǵy jumystar jańasha qarqyn alyp, aýyldar kórkeıe túsetinine senimdimin.

Álemdik saıasat almaǵaıyp kúı keship turǵan kezeńde jańa reformalarmen halyqtyń ál-aýqatyn jaqsartýǵa talpyný ońaı sharýa emes. Mundaı sátte eldiń birligi, yn­tymaǵy asa mańyzdy. «Bir jaǵadan bas, bir jeńnen qol» shyǵaryp, eldiń erteń­ine nyq senimmen qarap, Memleket bas­shy­synyń saıasatyn qoldaý arqyly bola­shaǵymyzdy baıandy etýge múmkindik zor.

Jarqynbek AMANTAI,

Pavlodar oblystyq máslıhatynyń depýtaty